რუსული ჰაკერების ჯგუფი Cold River-ი, ზაფხულში, შეერთებულ შტატებში, სამ ბირთვულ კვლევით ლაბორატორიას დაესხა თავს. ინფორმაციას Reuters-ის ჟურნალისტები, კიბერუსაფრთხოების ხუთი ექსპერტის მიერ დამოწმებული ინტერნეტჩანაწერების საფუძველზე, ავრცლებენ.

ცნობილი გახდა, რომ 2022 წლის აგვისტოდან სექტემბრამდე, მაშინ, როცა პრეზიდენტმა ვლადიმერ პუტინმა განაცხადა, რომ რუსეთის ფედერაცია მზად იქნებოდა ბირთვული იარაღი თავისი ტერიტორიის დასაცავად გამოეყენებინა, Cold River-ის ჰაკერები თავს დაესხნენ აშშ-ს სამ ბირთვულ ლაბორატორიას: Brookhaven-ს (BNL), Argonsk-ს (ANL) და Lawrence Livermore National Laboratory-ს (LLNL).

ამასთან, Reuters-ი წერს, რომ ჟურნალისტებმა ვერ დაადგინეს, რატომ იქნა სამიზნედ ეს ლაბორატორიები არჩეული და რამდენად წარმატებული იყო კიბერთავდასხმები. კიბერუსაფრთხოების მკვლევრების და დასავლელი ოფიციალური პირების თქმით, Cold River-მა ჰაკერული კამპანია კიევის მოკავშირეების წინააღმდეგ 24 თებერვალს უკრაინაში რუსეთის სრულმასშტაბიანი შეჭრის შემდეგ გააძლიერა.

აღნიშნულია, რომ თავდასხმა ამერიკულ ლაბორატორიებზე დაახლოებით იმავე დროს მოხდა, როდესაც IAEA-ს ექსპერტები უკრაინაში ზაპოროჟიეს ატომური ელექტროსადგურის მოსანახულებლად ჩავიდნენ.

ჟურნალისტები წერენ, რომ Cold River-ის ჯგუფი პირველად 2016 წელს ბრიტანეთის საგარეო საქმეთა სამინისტროზე თავდასხმის შემდეგ გამოჩნდა. ბოლო წლებში ისინი ასევე ათობით სხვა გახმაურებულ ჰაკერულ ინციდენტში მონაწილეობდნენ.