რუსულ ლისტინგებს ინდექსებიდან ამოიღებენ. ამის შესახებ აქციების ინდექსის პროვაიდერმა კომპანია MSCI-მ ექსკლუზიურად სააგენტო Reuters-ს განუცხადა.
პროვაიდერი ამბობს, რომ ეს „შემდეგი ბუნებრივი ნაბიჯი იქნება,“ რადგან დასავლეთის ახალი მკაცრი სანქციებისა და ცენტრალური ბანკის ვაჭრობის შეზღუდვის გამო, რუსეთის საფონდო ბაზარი არაინვესტირებადი გახდა.
„ჩვენთვის დიდი აზრი აღარ ექნება რუსული ფასიანი ქაღალდების ჩართვას, თუ ჩვენი კლიენტები და ინვესტორები ბაზარზე ტრანზაქციას ვეღარ შეძლებენ. ყველა ჩვენგანისთვის აშკარაა, რომ ბაზარზე ვაჭრობა მეტად რთულია და დღეს ის, ფაქტიურად, არაინვესტირებადია,“ - აცხადებს MSCI-ის ინდექსების კვლევის ხელმძღვანელი და ინდექსის პოლიტიკის კომიტეტის თავმჯდომარე, დიმიტრი მელასი.
მისი თქმით, MSCI-მ დაუყონებლივ უნდა დაიწყოს კონსულტაციებს ინვესტორებთან, რისი შედეგიც, დაგეგმილ ქმედებებთან ერთად, შესაძლოა, რამდენიმე დღეში გამოცხადდეს.
MSCI-მ გასულ კვირას გამოაცხადა, რომ ინდექსი გაყინა და თებერვლის მიმოხილვის ფარგლებში, რუსული ფასიანი ქაღალდების ცვლილებებს აღარ განახორციელებს.
„ჩვენ ჯერ არ მიგვიღია გადაწყვეტილება, თუმცა მომდევნო ბუნებრივ ნაბიჯად რეალურად განვიხილავთ ჩვენი ინდექსებიდან MSCI Russia-ს ან რუსული ფასიანი ქაღალდების ამოღებას,“ - ამბობს მელასი.
გუშინ MSCI-მ გამოაქვეყნა ანგარიში, რომელშიც ბაზრის მონაწილეებისგან, საერთაშორისო ინსტიტუციური ინვესტორებისთვის რუსეთის სააქციო ბაზრის ხელმისაწვდომობისა და ინვესტირებადობის ამჟამინდელი დონის შესახებ გამოხმაურებებს მოითხოვდა. MSCI აცხადებს, რომ დამატებით შეტყობინებას კვირის ბოლომდე, ბაზრის მონაწილეების გამოხმაურების განხილვის შემდეგ გაასაჯაროვებს.
bpn.ge