რუსულ ზეთზე საექსპორტო გადასახადმა ისევ მოიმატა და 28 თებერვლის ჩათვლით ტონაზე 260,1 დოლარით განისაზღვრა, ნაცვლად იანვარში არსებული 251,4 დოლარისა. რუსეთის სოფლის მეურნეობის სამინისტროს განცხადების მიხედვით, განაკვეთი გამოითვლება ტონაზე 1,371,7 დოლარის საორიენტაციო ფასით.

ცნობისათვის, რუსეთში ზეთზე მოქნილი საექსპორტო გადასახადი 2021 წლის 1-ლი სექტემბრიდან დაწესდა და 2022 წლის 31 აგვისტომდე იმოქმედებს. გადასახადი ყოველთვიურად ახლდება. მისი ოდენობა საორიენტაციო ფასსა და საბაზისო ფასს შორის სხვაობის 70%, ანუ ტონაზე ათასი დოლარია. ფასების მონიტორინგს სოფლის მეურნეობის სამინისტრო ახორციელებს.

სამინისტროს დაქვემდებარებული ცენტრის, „აგროექსპორტის“ მონაცემებით, თებერვალში ზეთის მსოფლიო მიწოდების FOB ფასები რუსეთის პორტებში ტონაზე 1360-1370 დოლარამდე გაიზარდა. „აგროექსპორტი“ წერს, რომ ფასებმა გაურკვეველი გეოპოლიტიკური ვითარების, ნავთობის ფასებისა და მცენარეული ზეთის ბაზარზე მსოფლიო ფასების ზოგადი ზრდის გამო მოიმატა.

SovEcon-ის მონაცემებით, მზესუმზირის ზეთის საექსპორტო FOB ფასი გასულ კვირას 10 დოლარით გაძვირდა და ტონაზე 1385 დოლარს მიაღწია, ხოლო სოფლის მეურნეობის ბაზრის კონიუნქტურის ინსტიტუტი (Икар) ტონაზე 1380 დოლარამდე ზრდას აფიქსირებს.

2021 წელს რუსული ზეთის ექსპორტი 2020 წლის 2,7 მლრდ დოლარიდან, თითქმის, 3,9 მლრდ დოლარამდე გაიზარდა.

2021 წელს რუსული ზეთისა და ცხიმოვანი პროდუქტების იმპორტის ლიდერები იყვნენ: ჩინეთი (1,7 მილიონი ტონა), თურქეთი (1,2 მილიონი ტონა), ირანი (720 ათასი ტონა), ბელარუსი (685 ათასი ტონა) და ლატვია (463 ათასი ტონა).

bpn.ge