რუსეთ-უკრაინის ახალი დიდი ომის მოლოდინში რუსული ენერგოკომპანიებისა და ბანკების აქციები ორნიშნა პროცენტული მაჩვენებლით მცირდება. ბოლო 5 დღეში გაზპრომის კაპიტალიზაცია 12%-ით შემცირდა, ინტერ რაოსი 13%-ით, როსნეფტის 18%-ით. აბსოლუტურ გამოხატულებაში ეს $28 მლრდ-იანი დანაკარგია.

ენერგოგიგანტების გარდა ბოლო 5 დღეში 12.5%-ითაა შემცირებული ვითიბი ბანკის აქციების ღირებულება, 15.3%-ით სბერბანკის, აეროფლოტის 13%-ით, სატელეკომუნიკაციო კომპანია MTS-ის 8.5%-ით, იანდექსის 8.5%-ით. კონგლომერატ სისტემის 12%-ით, ალუმინის მწარმოებელი რუსალის 15%-ით...

თბილისის დროით 21 თებერვლის 18:00 სთ-ისთვის Bloomberg-ის პლატფორმაზე 1 აშშ დოლარის ღირებულებამ 79.3 რუბლს გადააჭარბა, რაც სავაჭრო სესიის გახსნის შემდეგ 2.4%-იან ვარდნას ნიშნავს.

ომი ჯერ არ დაწყებულა და არც დაანონსებული სანქციები შესულა ძალაში, აქციების ვარდნის მიზეზი მოლოდინებია.

ომის შემთხვევაში რუსეთს გარდაუვალად სანქციები ელის, რამდენად მძიმე რთული სათქმელია. თუ რუსული არმია დონეცკისა და ლუგანსკის ოლქებს არ გასცდა სავარაუდოდ SWIFT-დაან არ გათიშავენ, მაგრამ სანქციები ნებისმიერ შემთხვევაში რუსეთის ეკონომიკას დააზარალებს, მათ გარეშეც ომი რუსეთს ფინანსურად იაფი არ დაუჯდება, სხვა საქმეა რამდენად უღირს პუტინს საოკუპაციო არეალის გაფართოება ეკონომიკურ ვარდნად.

რეგიონში უკვე 2 თვეა დაძაბულია. ბრძანების მოლოდინში საკუთრივ რუსეთიდან, ანექსირებული ყირიმიდან, ბელარუსიდან, ოკუპირებული დნესტრისპირეთიდან შავი და აზოვის ზღვებიდან უკრაინის საზღვრებს, რუსული არმია 200 000-მდე ჯარისკაცითაა მიმდგარი.

რუსეთი ამტკიცებს რომ ომს არ აპირებს, პარალელურად ღიად აცხადებს, რომ რადგან ნატომ მისი ულტიმატუმი არ მიიღო, იძულებული გახდება იმოქმედოს, მათ შორის სამხედრო-ტექნიკური ღონისძიებების განხორციელებით.

თუ 2008 წლის აგვისტოს ომი რუსეთს უბრალოდ შერჩა და მხოლოდ დასავლელი ლიდერების საყვედურის მოსმენა მოუწია, 2014 წელს ყირიმის ანექსიისა და აღმოსავლეთ უკრაინის რეგიონების ოკუპაციის პასუხად მართალია სუსტი, მაგრამ გარკვეული სანქციები მაინც მიიღო, რამაც 2015 წლის რუსეთის ეკონომიკა 2%-ით შეამცირა, 2016 წელსაც ზრდა მხოლოდ 0.2% იყო.

რუსეთი ცხოვრების დონით გერმანიისა და ნორვეგიისგან ძალიან შორს დგას. ყირიმის ანექსიის შემდეგ პუტინის რეიტინგი რეკორდულად გაიზარდა. საინფორმაციო პროპაგანდის ფონზე არათუ დუმის წევრებს, რიგითი მოქალაქეების დიდ ნაწილსაც სოციალურ ან ინფრასტრუქტურულ პროექტებს დაპყრობილი ტერიტორიების გაფართოება ურჩევნიათ.