გერმანიის მთავრობა რუსეთიდან გაზის მიწოდების უეცარი შეწყვეტის შემთხვევისთვის საგანგებო პაკეტს ამზადებს. ექსკლუზიურ იფორმაციას Reuters-ი ამ საკითხის მცოდნე სამ პირზე დაყრდნობით ავრცელებს.
სააგენტოს თანამოსაუბრეები ამბობენ, რომ ჯერ უცნობია, არის თუ არა მიწოდების უეცარი შეწყვეტა მოსალოდნელი, თუმცა გერმანიას სიტუაციის ასეთი ესკალაციისგან თავის დაზღვევა სურს. მთავრობა შიშობს, რომ რუსეთს შეუძლია, ცალმხრივად შეწყვიტოს გაზის ნაკადი და სურს, ამას საგანგებო გეგმით გაუმკლავდეს. ამ გეგმის პრიორიტეტი არის ენერგოკომპანიებისთვის დახმარების გაწევა, მათ შორის დამატებითი სესხებისა და სამთავრობო გარანტიების მეშვეობით, რომ ისინი მზარდ ფასებს გაუმკლავდნენ.
ამასთან, საგანგებო პაკეტით გერმანიის მთავრობას კრიტიკული საწარმოების, მათ შორის ნავთობგადამამუშავებელი ქარხნების ნაციონალიზაციის უფლება ეძლევა. შესაბამისი კანონი გასულ თვეში დამტკიცდა. წყაროს ცნობით, მთავრობა ახლა იმაზე მსჯელობს, შეიძლება თუ არა ამ ღონისძიების პრაქტიკაში გატარება, მათ შორის ქალაქ შვედტში მდებარე RSK-ის ქარხანაში, რომელიც „როსნეფტს“ ეკუთვნის. იმპორტირებული რუსული ნავთობის უმეტეს წილს ეს ქარხანა გადაამუშავებს.
გერმანიის შესაძლო ქმედებაზე „როსნეფტი“ Reuters-თან კომენტარს არ აკეთებს. სააგენტოს ერთ-ერთი წყაროს ცნობით, განიხილება ენერგეტიკული კომპანიების ნაციონალიზაციის ვარიანტი, თუმცა ეს ენერგომომარაგების უსაფრთხოების საფუძველზე ყურადღებით უნდა იქნეს აწონილი და დასაბუთებული.
გერმანიის მთავრობა, ასევე, საგანგებო სიტუაციის დროს გაზის რეზერვების განაწილებას განიხილავს. მარეგულირებელს მოუწევს, განსაზღვროს, თუ ვის მიანიჭოს უპირატესობა მიწოდებაში, ინდუსტრიას თუ მოსახლეობას. გერმანიის ამჟამინდელი პოლიტიკით, მიწოდებისგან პირველ რიგში საწარმოები ითიშება.
კომენტარის მოთხოვნის საპასუხოდ, გერმანიის ეკონომიკის სამინისტრომ Reuters-ს ვიცე-კანცლერ რობერტ ჰაბეკის განცხადებაზე მიუთითა, რომ გერმანია „ინტენსიურ ძალისხმევას“ ეწევა რუსული ენერგიის მოხმარების შესამცირებლად.
2021 წელს გერმანიაში იმპორტირებული გაზის 55% რუსეთის წილი იყო. ევროკავშირში ემბარგოზე დისკუსიის ფონზე, გერმანია აცხადებს, რომ რუსული გაზის წილის 10%-მდე შემცირებას მხოლოდ 2024 წლის შუა რიცხვებისთვის შეძლებს. გერმანიამ სანქციების მეხუთე პაკეტში რუსულ ქვანახშირზე ევროკავშირის ემბარგოს მხარი დაუჭირა და გამოთქვა მზადყოფნა, მხარი დაუჭიროს რუსული ნავთობის აკრძალვასაც, თუკი ემბარგო ეტაპობრივად დაწესდება.