რუსულ საექსპორტო ნავთობზე Urals-ზე ფასდაკლება 20 დოლარამდე შემცირდა ბრიტანულ Brent-თან შედარებით. აღნიშნული კი პირველ რიგში განპირობებულია ტანკერების დაქირავების გაიაფებით. ამის შესახებ რუსეთის ენერგეტიკული საააგენტოს ხელმძღვანელმა დენის დერიუშინმა განაცხადა.

მისი თქმით, ჯერ კიდევ რამდენიმე თვის წინ ფასდაკლება ბრიტანულ ნავთობთან შედარებით 40 დოლარი იყო ბარელზე, ახლა კი ის 20 დოლარამდეა შემცირებული, თუმცა მისივე თქმით, ეს მაინც დიდი სხვაობაა.

როგორც ცნობილია, რუსული საექსპორტო ნავთობის Urals-ის ფასი თებერვალში 100 დოლარს აღწევდა ბარელზე, თუმცა მას შემდეგ რაც რუსეთი უკრაინაში შეიჭრა, მისი ფასი კლებაში წავიდა და განსხვავება Brent-თან გაიზარდა. ტრადიციულად კი, ამ ორი ტიპის ნავთობს შორის ფასის სხვაობა 3 დოლარს არ აღემატებოდა ბარელზე, ხოლო რუსულ ნავთობზე მაღალი მოთხოვნის ფონზე 2021 წელს ის Brent-ზე უფრო ძვირიც კი ღირდა.

დღეისათვის რუსულ ნავთობზე ფასის კლება ევროპელი იმპორტიორების უარის გამო ხდება, ამასთან, ქვეყანას აქვს მისი მიწოდების პროცესში ლოჯისტიკური პრობლემები, სანქციების გამო. დღეისათვის ერთი ბარელი Urals-ის ფასი 75 დოლარის ფარგლებში მერყეობს, ხოლო ბრიტანული Brent-ის 95-დან 100 დოლარამდე.

ბიზნესპრესნიუსი