შპს „რითეილ ჯგუფი“ „მაგნიტის“ სახელით 2017 წლის ნოემბრიდან ოპერირებს. თავიდანვე გეტყვით, რომ კომპანია 100 პროცენტით ქართული კაპიტალითაა შექმნილი, ყველა მეწილე კი ქართველია. მედიაჰოლდინგი დაინტერესდა, იყო თუ არა რუსული „მაგნიტის“ ქსელის წარმატება ქართული ბრენდის შექმნის ინსპირაცია და რატომ შეარჩიეს ისეთი ბიზნეს მოდელი, რომელიც რუსული ქსელის იდენტურია? საკითხზე „კომერსანტთან“ „მაგნიტის“ აღმასრულებელი დირექტორი ია ნადირაშვილი საუბრობს. იგი ამბობს, რომ სუპერმარკეტების ქსელის შექმნის იდეა მიზიდულობის ქსელის შექმნაში მდგომარეობდა და რუსული მაღაზიის ფრენჩაიზს არ წარმოადგენს. მეტიც, მისი თქმით, რუსულ კომპანიასთან არანაირი კავშირი არ აქვთ:
„2015 წლიდან, მაშინ როდესაც მაღაზიებს „მაგნიტი“ დაერქვა, ამის მიზანი იყო იდეა, რომ საქართველოს რეგიონებში - სოფლებში და ქალაქებში შექმნილიყო „მიზიდულობის ცენტრი“. რუსულ ქსელთან ქართულ ბრენდს კავშირი არ აქვს. რეგიონებში ქსელური მარკეტების ცნება არ არსებობდა, ფუნქციონირებდა კერძო, მცირე ზომის მარკეტები. „მაგნიტი“ იყო პირველი, ვინც რეგიონებში თანამედროვე ყიდვის პროცესი დანერგა: ცენტრალიზებული საფასო სისტემა, უნაღდო ანგარიშსწორებით გადახდა, პროდუქციის მრავალფეროვანი ასორტიმენტი“, - აცხადებს ია ნადირაშვილი.
კომპანიის აღმასრულებელი დირექტორი ამბობს, რომ „მაგნიტის“ მაღაზიების ადგილობრივების მხრიდან მიზიდულობის ცენტრად ქცევამ გამოიწვია ის ფაქტორი, რომ კომპანიის სახელი სრულიად გამართლებული იყო და უკვე 2018 წლიდან დაიწერა ბრენდის სტრატეგია. მისი თქმით, აღნიშნული ითვალისწინებდა რებრენდინგს, რომელიც განხორციელდა ქართველი დიზაინერების და მარკეტინგის სპეციალისტების მიერ.
„მაგნიტის“ რებრენდინგი ქართველი სპეციალისტების მიერ განხორციელდა. ლოგოს დიზაინი ეკუთვნის დიზაინერ გიორგი ჭიჭინაძეს, 2018 წელს კი კომპანია ბრენდინგ.ჯიმ იმუშავა „მაგნიტის“ ბრენდის სტრატეგიაზე, სახელი „მაგნიტი“ უკვე არსებობდა, ამ კომპანიამ შექმნა მისიისა და ღირებულებების დოკუმენტი, იმუშავა ბრენდის პოზიციონირებასა და პერსონიფიცირებაზე, რითაც დღესაც ვხელმძღვანელობთ. ბრენდი დაიხვეწა, ქართული ბიზნესი კი გაფართოვდა. სტრატეგია, რომლის მიხედვითაც „მაგნიტმა“ ოპერირება საქართველოს რეგიონებიდან დაიწყო, გამართლებული იყო როგორც კომპანიისთვის, ისე სახელმწიფოსთვის. რეგიონებში მაღაზიების გახსნამ გამოიწვია არაერთი ბიზნესის გაფართოება, იქნება ეს სადისტრიბუციო ქსელები, თუ მომწოდებლები, რომლებმაც თბილისს (დიდი ქალაქების) გარეთაც დაიწყეს ოპერირება, მოსახლეობა კი პროდუქციის ყიდვის თანამედროვე სტანდარტზე გადავიდა. აქ უამრავი ფაქტორია აღსანიშნავი. ერთ-ერთი მნიშვნელოვანი კი მოსახლეობის დასაქმება და განათლების დონეა. „მაგნიტმა“ დაიწყო კადრების გადამზადება იმისთვის, რომ თავის მარკეტებში მომსახურების სტანდარტი დანერგილიყო. ადგილობრივი მოსახლეობის დიდი ნაწილი დასაქმდა და შესაბამისად ეკონომიკურ განვითარებას შეუწყო ხელი“, - განმარტავს ია ნადირაშვილი.
კომპანიის აღმასრულებელი დირექტორი ია ნადირაშვილი გვიყვება, რომ FMCG (კვებისა და სწრაფი მოხმარების) სექტორის მსხვილ საცალო მოთამაშეებს შორის, „მაგნიტს“ სავაჭრო ბაზრის წილის ზრდის მოწინავე პოზიციები უჭირავს. ია ნადირაშვილი „კომერსანტთან“ სუპერმარკეტების ქსელის სამომავლო გეგმებზე საუბრობს:
„მაგნიტი“ არაერთ პროექტზე მუშაობს, მათ შორის, „მაგნიტის“ წარმოების განვითარება, როგორც ქართული, ადგილობრივი ბიზნესი. საწარმო წარმოდგენილია უახლესი დანადგარებით და პროფესიონალი კადრებით. ასევე, ერთ-ერთი პრიორიტეტია ორგანიზაციული ზრდა; მომხმარებლის კმაყოფილებაზე ზრუნვა; მომხმარებლებისთვის ინოვაციური პროექტები შეთავაზება“, - აცხადებს ნადირაშვილი.
„მაგნიტის“ აღმასრულებელი დირექტორი ამბობს, რომ პანდემიური სიტუაციიდან გამომდინარე, რა თქმა უნდა იყო სირთულეები, თუმცა ერთ-ერთი ყველაზე მზარდი კომპანიაა. მისი თქმით, დღეს „მაგნიტს“ 300-მდე ფილიალი აქვს და 4500-მდე თანამშრომელს ასაქმებს. „მაგნიტის“ ყველაზე მეტი ფილიალი თბილისშია წარმოდგენილი, შესაბამისად ერთ-ერთი ყველაზე აქტიური ზონა დედაქალაქია.