VTB-ის ზარალი 2022 წელს რეკორდული 613 მილიარდი რუბლი იყო, რაც 10-ჯერ მეტია წინა რეკორდულ შედეგზე. თუმცა ბანკი 2023 წლის დასრულებას რეკორდული მოგებით გეგმავს. Forbes-ის ინფორმაციით, დიდი ალბათობით, ეს მოგება მიმართული იქნება კაპიტალის შევსებაზე და არა დივიდენდებზე. VTB-მ თავისი ფინანსური ანგარიშგება ერთწლიანი შესვენების შემდეგ, დღეს წარადგინა.

2022 წლის ბოლოს VTB ჯგუფის ზარალმა ფასს-ის მიხედვით შეადგინა 612,6 მილიარდი რუბლი. ეს არის რეკორდული უარყოფითი ფინანსური შედეგი ბანკის ისტორიაში, წინა რეკორდული ზარალი დაფიქსირდა 2009 წელს - 59,6 მილიარდი რუბლი.

ვითიბი ჯგუფის ფინანსურ ანგარიშგებაში გათვალისწინებული იყო ბანკ „Открытие“-ს შესყიდვა გასული წლის დეკემბრის ბოლოს. გარიგებამ მოგება გამოიღო: VTB–მ ბანკს გადაუხადა 340 მილიარდი რუბლი, ხოლო „Открытие“-ს წმინდა აქტივებმა შეადგინა 505 მილიარდი რუბლი. ამგვარად, VTB-ის შემოსავალმა ტრანზაქციის შედეგად შეადგინა 165 მილიარდი რუბლი.

„ამ შემოსავლის გარეშე ვითიბი ჯგუფის ზარალი 777 მილიარდ რუბლი იქნებოდა“, განაცხადა ვითიბი-ს თავმჯდომარის მოადგილემ დიმიტრი პიანოვმა ბრიფინგზე.

2022 წელს ბანკის აქტივები გაიზარდა 17%-ით - 20,9-დან 24,4 ტრილიონ რუბლამდე. იურიდიულ პირებზე გაცემული სესხების მოცულობა გაიზარდა 18,4%-ით, ფიზიკურ პირებზე გაცემული სესხები - 17,5%-ით. ბანკის წმინდა საპროცენტო შემოსავალი განახევრდა - 646,3-დან 321 მილიარდ რუბლამდე, საკომისიოს შემოსავალი - 7,4%-ით, 146,8 მილიარდ რუბლამდე.