2022 წლის იანვარ-ოქტომბერში საქართველომ 58%-ით ნაკლები ხორბალი იყიდა ვიდრე 2021 წლის ანალოგიურ პერიოდში. საქსტატის მონაცემების მიხედვით, 2022 წლის 10 თვეში საქართველომ 134,322.97 ტონა ხორბლისა და მელისინის იმპორტი განახორციელა, 2021 წლის 10 თვეში კი 318 800.84 ტონის.

არსებული სტატისტიკური მაჩვენებლების მიხედვით, იანვარ-ოქტომბერში იმპორტირებული ხორბლის 93%-ი რუსეთზე მოდის, ხოლო დანარჩენი ყაზახეთზე, სომხეთზე, უკრაინაზე, თურქეთზე , ავსტრიასა და გერმანიაზე.

მიმდინარე მაჩვენებლების თანახმად, 2022 წლის იანვარ-ოქტომბერში საქართველომ რუსეთიდან 45,409.57 ათასი დოლარის ღირებულების 124,926.19 ტონა ხორბალი იყიდა.

მთლიანობაში კი 10 თვეში საქართველომ იმპორტირებულ ხორბალში სულ 48,308.62 ათასი დოლარი გადაიხადა.

აღსანიშნავია, რომ ქვეყანაში ხორბლის იმპორტის შემცირება პურის ფქვილის იმპორტის ზრდის ხარჯზე ხდება. რუსეთ-უკრაინის ომიდან გამომდინარე გარკვეულ თვეებში საქართველო ძირითადად ფქვილის იმპორტზე იყო დამოკიდებული და ქვეყანაში მიზერული რაოდენობის ხორბალი შემოდიოდა. თავის მხრივ კი აღნიშნული გამოწვეული იყო როგორც გარე ასევე შიდა ფაქტორებით.

საქსტატის ინფორმაციით, 2022 წლის იანვარ-ოქტომბერში ქვეყანამ 55,605.16 ათასი დოლარის ღირებულების 147,098.25 ტონა ხორბლის ან ხორბალ-ჭვავის ფქვილი იყიდა. რაც გასული წლის მაჩვენებლებთან შედარებით 5-ჯერ მეტ ზრდას აჩვენებს. 2021 წლის 10 თვეში საქართველოში სულ 22 451.88 ტონა ფქვილის იმპორტი დაფიქსირდა.

როგორც ხორბლის იმპორტის სეგმენტში, ასევე ფქვილის იმპორტიორ ქვეყნებს შორის რუსეთი უპირობო ლიდერია. 2022 წლის იანვარ-ოქტომბერში საქართველომ რუსეთიდან 145,443.05 ტონა ფქვილი იყიდა, რაც საანგარიშო პერიოდში მთლიანად იმპორტირებული ფქვილის თითქმის 99%-ია.

ხორბლისა და ფქვილის მწარმოებელთა ასოციაციის თავმჯდომარე ლევან სილაგავა „კომერსანტთან“ აცხადებს, რომ დღეისათვის ფქვილისა და ხორბლის იმპორტის მხრივ ბალანსი დაცულია. მისივე განმარტებით, ბაზარზე საკმაოდ სტაბილური ვითარებაა და 1 ტომარა პირველი ხარისხის ფქვილის ფასი 68-70 ლარია, მაშინ როდესაც 3 თვის უკან 80 ლარი და მეტიც კი ღირდა.

„ხორბალსა და ფქვილს შორის დღეისათვის ასე თუ ისე ბალანსია შენარჩუნებული, იქიდან გამომდინარე, რომ 3 თვის წინ რუსეთიდან მცურავმა ბაჟმა დაიკლო და 30 დოლარამდეც კი დავიდა. პიკი გახსოვთ, ბაჟი თებერვალ-მარტში 100 დოლარზე ზემოთაც კი იყო ასული. დღეს ბაჟი 45 დოლარის ფარგლებშია. ეს ტარიფი იმითაა ნორმალური, რომ გარკვეული სტაბილურობა მომავლისთვის იყოს განსაზღვრული. გააგრძელა მუშაობა „მარცვლეულის დერეფანმა“, რომლის გარკვეულ შემაფერხებელ ფაქტორად მიიჩნეოდა ის, რომ მიდიოდა საუბარი იმაზე, ხომ არ დაბლოკავდა მის მუშაობას რუსეთი. თუმცა საბოლოოდ შეთანხმება შემდგომ 4 თვეზე უკვე მიღწეულია. ვიცით, რომ რუსეთს დიდი მოსავალი აქვს. რუსეთს ჰქონდა პრეტენზია, რომ მისი ხორბალი და სასუქი არ გადიოდა შეუფერხებლად მსოფლიო ბაზარზე, რაც გათვალისწინებული იყო გაეროსთან გაფორმებული მემორანდუმით და რუსული მხარე უკმაყოფილო იყო მისი არასრულყოფილი მოქმედებით. გაერომ დაადასტურა, რომ შეთანხმება მიღწეულია და შესაბამისად რუსული ხორბალი, რომელიც დიდ რაოდენობითაა, საუბარია 50 მლნ ტონა საექსპორტო მოცულობაზე, ესეც გამოვა მსოფლიო ბაზარზე, რაც ფასზე დადებითად იმოქმედებს. ვფიქრობთ, რომ მცურავი ბაჟი დღეს არსებულ პარამეტრებში დარჩება. შესაბამისად წისქვილებსაც მუშაობის შესაძლებლობა მიეცემათ.

უახლოესი თვეების განმავლობაში რაიმე სერიოზულ ცვლილებებს ბაზარზე არ ველით: არც ხორბალზე და არც ფქვილზე. პირიქით დადებითი ტენდენციების მოლოდინია.

1 ტომარა პირველი ხარისხის ფქვილის ფასი 68-70 ლარია, რაც 3 თვის წინანდელ ფასებთან შედარებით დაკლებულია. ამ ფასებით მუშაობა საკმაოდ ნორმალურად შეიძლება და უახლოესი თვეების განმავლობაში პურზე ფასები სტაბილურად შენარჩუნდება“, - განუცხადა „კომერსანტს“ ლევან სილაგავამ.