უკრაინელი მოქალაქეების მხარდასაჭერად ,,გეფერინმა“ უკრაინაში 12 000 ლარის ღირებულების ფეხსაცმელი გაგზავნა. როგორც კომპანიის დამფუძნებელი ილია გეფერიძე ,,კომერსანტთან“ ამბობს, ბიზნესი სოლიდარულია და მნიშვნელოვანია მცირე წვლილიც, რასაც ქართული კომპანიები გასაჭირში მყოფი უკრაინელი მოქალაქეების დახმარების მიზნით გაიღებენ.
,,სააგენტოს ,,აწარმოე საქართველოში“ ფარგლებში წამოწყებული კამპანია უკრაინელი მოქალაქეების მხარდასაჭერად ძალიან მნიშვნელოვანია. გვითხრეს, რომ ზამთრის ფეხსაცმელები არის საჭირო და მაშინვე მივიღეთ ზომები. მოვაგროვეთ და გავუგზავნეთ 12 000 ლარის ღირებულების ,,გეფერინის“ ბრენდის ფეხსაცმელი, რომელიც უკრაინაში უკვე გაიგზავნა. უკრაინა ჩვენი მეგობარი ქვეყანაა, ყველა ერთსულოვნად ვართ სოლიდარული და ვგმობთ რუსეთის აგრესიას თავისუფალი ქვეყნის მიმართ. მიმაჩნია, რომ ასეთ გასაჭირში უკრაინელ ხალხს გვერდით უნდა დავუდგეთ. მინიმალურია, რაც კომპანიებს შეუძლიათ ამ ადამიანების მხარდასაჭერად“, - ამბობს ილია გეფერიძე.
შეგახსენებთ, რომ სააგენტოს „აწარმოე საქართველოში“ ფართომასშტაბიანი კამპანია „აწარმოე უკრაინისთვის“ საქართველოს მთავრობის ინიციატივით 28 თებერვალს დაიწყო.
კამპანიაში ჩართულია ასევე რამდენიმე ქართული კომპანია, რომელთა მიერ მოწოდებული პროდუქცია გადაეცემა საქართველოში დარჩენილ უკრაინელ მოქალაქეებს, ნაწილი კი გაიგზავნება უკრაინაში.
მარი ჩიტაია