დილის 08:00 სთ-ზე საქართველოს მთელ ტერიტორიაზე, ოკუპირებული რეგიონების გამოკლებით, საარჩევნო უბნები გაიხსნა. მოსახლეობა 64 ქალაქის მერს და ამდენივე ქალაქის საკრებულოს 2068 წევრს ირჩევს.
დამოუკიდებელი საქართველოს ისტორიაში ეს რიგით მე-8 თვითმართველობის არჩევნებია და რიგით მესამე სადაც ყველა ქალაქის მერი პირდაპირი წესით ირჩევა. პირველი ასეთი არჩევნები 1991 წლის 30 აპრილს გაიმართა, ბოლო 2017 წელს, თუმცა თვითმართველოობის არჩევნები საქართველოში ერთხელ 1919 წელს, გასაბჭოებამდეც ჩატარდა.
დედაქალაქის მერობისთვის 16 კანდიდატი იბრძვის, მთავარ კადიდატებად მოქმედი მერი კახა კალაძე, ნაციონალური მოძრაობის თავმჯდომარე ნიკა მელია და ყოფილი პრემიერი, ამჟამად პარტია „საქართველოსთვის“ დამფუძნებელი გიორგი გახარია განიხილებიან. მოქმედი კანონმდებლობით გამარჯვებულად ცხადდება ის კანდიდატი, ვინც უბანზე მისული ამომრჩევლის (არ ითვლება გაბათილებული ბიულეტინები) 50%+1 ხმას მიიღებს, უფრო დაბალი მხარდაჭერის შემთხვევაში პირველ და მეორე ადგილზე გასული პირები ერთმანეთს მეორე ტურში შეეჯიბრებიან.
ოპოზიციის დიდი ნაწილი ამ არჩევნებს რეფერენდუმად განიხილავს და აცხადებს, რომ თუ მმართველმა პარტიამ 43%-ზე ნაკლები მიიღო, შარლ-მიშელის შეთანხმების თანახმად ხელისუფლებას 2022 წელს რიგგარეშე საპარლამენტო არჩევნებს დაანიშნინებენ. ქართული ოცნება, რომელმაც შეთანხმება დატოვა რიგგარეშე საპარლამენტო არჩევნებს გამორიცხავს.