ისედაც მაღალი ინფლაციის ფონზე, იმის გათვალისწინებით, რომ საკვებზე ფასი სხვა პროდუქტებზე უფრო მეტად გაიზარდა, ყველაზე მეტად სოციალურად დაუცველთა ცხოვრება გაძვირდა. თუ აპრილში ინფლაციის განაკვეთმა 11.8% შეადგინა, საარსებო მინიმუმი 18.9%-ით გაიზარდა.

საქსტატის დათვლით 2021 წლის აპრილში საშუალო მომხმარებლის საარსებო მინიმუმი 180 ლარს შეადგენდა, შრომისუნარიანი მამაკაცის 203 ლარს, 1 წლის შემდეგ ეს რიცხვები 214 და 241 ლარამდე გაიზარდა. საარსებო მინიმუმისთვის არსებული პროდუქტთა ჩამონათვალი საერთო სამომხმარებლო კალათასთან შედარებით 1.6-ჯერ უფრო მეტად გაძვირდა. მსგავსი დამოკიდებულება სიახლეს არ წარმოადგენს. საარსებო მინიმუმის შესახებ ინფორმაცია საქსტატზე 2004 წლიდან იძებნება. ამ ხნის განმავლობაში საშუალო მომხმარებლის სიცოცხლისთვის აუცილებელი საარსებო მინიმუმის ღირებულება 200%-ით გაიზარდა, ფასების ზოგადი დონე - 167%-ით.

კითხვა თუ როგორ უნდა იცხოვროს ადამიანმა 214 ან თუნდაც 241 ლარით მართებულია, მაგრამ პასუხისმგებელი ამ შემთხვევაში საქსტატი არ არის. დაპირების საწინააღმდეგოდ მთავრობას შევარდნაძის პრეზიდენტობის დროს 2003 წლის 8 მაისს დამტკიცებული ფორმულა არ შეუცვლია.

19 წლის წინანდელი ბრძანების მიხედვით, შრომისუნარიანმა მამაკაცმა დღიურად 250 გრამი პური, 20 გრამი ლობიო, 15 გრამი მაკარონი, 10 გრამი ღორის ხორცი, 10 გრამი ძეხვი, 0.5 კვერცხი, 25 გრამი მაწონი, 15 გრამი სტაფილო, 20 გრამი ღვინო და ჯამში 40 დასახელების პროდუქტი უნდა იკმაროს რომელთა ჯამური ენერგეტიკული ღირებულება 2300 კილოკალორიას შეადგენს.

თავი რომ დავანებოთ 10 გრამი ხორცის მოცულობას, 2300 კილოკალორიაც არასაკმარისია და ის 13 წლის ბავშვის ნორმაა. 15-დან 50 წლამდე მამაკაცს საშუალოდ 2600-3000 კილოკალორია სჭირდება, ეს დამოკიდებულია წონაზე. ქალს შედარებით ნაკლები, თუმცა ფეხმძიმობისა და მეძუძურეობის პერიოდში უფრო მეტი.

რა უნდა იყოს რეალური საარსებო მინიმუმი? ამ კითხვაზე მზა პასუხი არ არსებობს. რაც უფრო მდიდარია ქვეყანა, ის მით უფრო მეტია. ფაქტია, საქართველო ღარიბ სახელმწიფოდ რჩება, მაგრამ ისიც ფაქტია, რომ 2003 წელს უფრო ღარიბი იყო.

დღეს ნომინალური ასაკობრივი პენსია საარსებო მინიმუმს აჭარბებს. 214 ლარზე მეტ ხელფასს იღებს დაქირავებით დასაქმებულთა აბსოლუტური უმრავლესობაც. თუ ახალი გადაანგარიშებით დადგინდება, რომ საარსებო მინიმუმი 500 ლარს შეადგენს, რაც ასევე ძალიან ცოტაა, მაგრამ შედარებით ადეკვატური, მაშინ ავტომატურად გაჩნდება მოთხოვნა, რომ პენსია საარსებო მინიმუმს გაუთანაბრდეს. მყისიერად პენსიის 500 ლარამდე გასაზრდელად სულ 2 გზა არსებობს სხვა უწყებებისთვის დაფინანსების მკვეთრი შემცირება და ლარის ბეჭდვა რაც ინფლაციას დააჩქარებს და ნომინალურ ზრდას აზრს დაუკარგავს.