საავტომობილო ბიზნესში სიტუაცია შედარებით გამოსწორდა. მართალია, ბაზარი დიდი დატვირთვით ახლაც ვერ მუშაობას, მაგრამ გაუმჯობესება ნამდვილად იგრძნობა. როგორც იმპორტიორები აცხადებენ, იმპორტი არ შეჩერებულა პანდემიურ პერიოდში, შესაბამისად, რეექსპორტშიც ზრდაა, თუმცა ბიზნესი ვითარდება ინერციით და ეს პროცესი შეიძლება პანდემიის პარალელურად გაგრძელდეს.

კომპანია ,,რობანი მოტორსის“ დამფუძნებლის ელგუჯა ჯამაგიძის თქმით, ნებისმიერ ქვეყანაშ საავტომობილო ინდუსტრიას სახელმწიფოს მხრიდან ხელშეწყობა აქვს, ხოლო საქართველოში ავტობიზნესი ასეთ შესაძლებლობას მოკლებულია.

კიდევ ერთ ტენდენციაზე, რაზეც იმპორტიორი „კომერსანტთან“ საუბარში ყურადღებას ამახვილეს, ფასებია. ჯამაგიძის თქმით, ევროპაში ავტომობილი 15-18%-ით გაძვირდა, მოიმატა ფასმაც ადგილობრივ ბაზარზე, თუმცა რეალიზაციის პრობლემაა.

,,საავტომობილო ინდუსტრიისთვის შეიცვალა ის, რომ ინდივიდუალური შეკვეთები აზიის მიმართულებით გაიზარდა. ვერ გეტყვით, რამ გამოიწვია - ეს ინფორმაცია დეტალურად ჩაშლილი არ არის, ფაქტია, რომ ამან სიტუაცია მეტნაკლებად გამოასწორა. მიუხედავად იმისა, რომ პრობლემა ჯერ კიდევ არის, გამოცოცხლებაც იგრძნობა, შეიძლება ითქვას, რომ ბიზნესი ინერციით ვითარდება. ნებისმიერ ქვეყანაში არის ხელშეწყობა, საქართველოს გარდა,  სახელმწიფო დონეზე არაფერი ხდება. ბიზნესის დონეზე არის კავშირები, მაგრამ არასაკმარისი, გაყიდვის პრობლემა გვაქვს, მანქანის ყიდვა ყველას იაფად უნდა. ამ დროს ევროპასა და აშშ-ში ავტომობილების ფასები გაზრდილია, დაახლოებით 15-18%-იანი სხვაობაა. დღესდღეობით ისეთი სიტუაციაა მსოფლიოში, რომ ფაქტობრივად უცხოურ ბაზრებზე უფრო ძვირი ღირს მანქანები, ვიდრე საქართველოში. ქვეყანაში სოციალური ფონი მძიმეა და ახლა ყველა იმას ცდილობს, რომ პანდემია ნაკლები დანახარჯით გადაიტანოს, ამიტომ ფუფუნებაზე არავინ ფიქრობს, შესაბამისად, ძალიან ცოტა მანქანა იყიდება“, - ამბობს ჯამაგიძე.

ავტოიმპორტიორის თქმით, პანდემიის დასრულების შემთხვევაში ბიზნესს მინიმუმ 1 წელი სჭირდება მდგომარეობის მეტ-ნაკლებად დასალაგებლად.

მიუხედავად იმისა, რომ დიდი გაჩერების შემდეგ წელს, მატება ფაქტობრივად ყოველ თვე შეინიშნება, 2019 წელთან შედარებით, მდგომარეობა ჯერ ისევ რთულია. კომპანია „იამოტოს“ ხელმძღვანელი პაატა მაისურაძე აცხადებს, რომ სახარბიელო ვითარება ნამდვილად არ არის, მაგრამ შარშანდელთან შედარებით, ბაზარი უფრო ადაპტირდა და გაყიდვებიც გაზრდილია.

,,ვერ ვეტყვით, რომ ავტობიზნესში და რეექსპორტის მიმართულებით სახარბიელო ვითარებაა. საქართველოს მდგომარეობიდან და ზოგადად, მსოფლიოში არსებული ვითარებიდან გამომდინარე, ავტომობილებზე მოთხოვნა მუდმივად არ შეიმჩნევა. თუმცა ფასები გაზრდილია. ლოგისტიკაზე, განსაკუთრებით აზიის მიმართულებით ტრანსპორტირების და გადაზიდვების მხრივ, ფასები გასამმაგებულია, რაც ავტობიზნესზე პირდაპირ ისახება“, - ამბობს  პაატა მაისურაძე.

შეგახსენებთ, რომ 2021 წლის იანვარ-სექტემბერში, უმსხვილესი საექსპორტო ჯგუფში ავტომობილები მეორე პოზიციაზეა. მსუბუქი ავტომობილების რეექსპორტმა 338.2 მლნ აშშ დოლარი შეადგინა.

აღნიშნულ პერიოდში მსუბუქი ავტომანქანები, 632.5 მლნ აშშ დოლარით, საიმპორტო სიის სათავეშია. 

ჯამში, 2021 წლის იანვარ-სექტემბერში, წინა წლის შესაბამის პერიოდთან შედარებით, საქართველოს საგარეო ვაჭრობა 22.3%-ით გაიზარდა და 10.01 მლრდ აშშ დოლარი გახდა.

მარი ჩიტაია