საავტომობილო სატვირთო გადამზიდავები, ქვეყნის დატოვებისას, საზღვარზე 14 მაისიდან 30 ლარის ნაცვლად 80 ლარს გადაიხდიან. ამის შესახებ გადამზიდავებს აცნობებენ ამ ტიპის განცხადებებით, რომლებიც საბჟოებზე ავტოპარკებშია გამოკრული. ეს ფოტო "კომერსანტს" ერთ-ერთმა გადამზიდავმა მოაწოდა.
"სატრანსპორტო დერეფნის კვლევის ცენტრში" ამ სიახლეზე ინფორმაცია აქვთ. მათაც, ჩვენს მსგავსად, ავტოპარკში გამოკრული განცხადების ფოტო თავად გადამზიდავმა მიაწოდა.
ორგანიზაციაში მიიჩნევენ, რომ ასეთი დაუსაბუთებელი გაძვირება დაუშვებელია. ცენტრის პრეზიდენტი პაატა ცაგარეიშვილი ყურადღებას ამახვილებს განცხადების გაუმართავ ფორმაზე და ჩვენთან საუბარში დასძენს, რომ ქვეყანას უვიცები მართავენ.
გარდა ამისა, ცაგარეიშვილი "კომერსანტს" უხსნის, რომ ქართული მხარის მიერ ტარიფის გაზრდის საპასუხოდ, თურქული მხარეც გააძვირებს ტარიფს და გამოვა, რომ ქართველი გადამზადავი, რომელიც ორივე მხარეს იხდის გადასახადს, 60 ლარის ნაცვლად, 160 ლარს გადაიხდის თურქეთში ტვირთის შეტანაზე. ცაგარეიშვილი ამტკიცებს, რომ სომხური მხარეც გაზრდის ტარიფს. ეს ყველაფერი კი ექსპერტის შეფასებით, დააწვება საავტომობილო გადამზიდავს, ანუ მცირე მეწარმეს და ეს მაშინ, როცა საქართველოს ხელისუფლებას დეკლარირებული აქვს მცირე მეწარმეობის ხელშეწყობის პოლიტიკა. ექსპერტისთვის გაუგებარია, რა ეკონომიკურ გაანგარიშებას შეიძლება ემყარებოდეს გადასახადის 2.7 ჯერ გაძვირება.
რა ხდება ძარცვაა???? ჯერ თუ განცხადებაა, გაუმართავად წერია, შეიძლება წერა კითხვის უცოდინარებმა მართონ ქვეყანა???? რა მოყვება ამ გაძვირებას? - თურქეთის მხარე, პასუხად, მეორე დღესვე აწევს გადასახადს და გაუტოლებს 80 ლარს, გამოვა, რომ ქართული მხარე, რომელიც ყველაზე მეტადაა დაინტერესებული თურქეთში განახორციელოს დატვირთვა, გადაიხდის ორივე მახარეს და მოუწევს 160 ლარის გადახდა ნაცვლად 60 ლარისა. პარკის გადასახადი, საქართველოდან სომხეთის მხარეს არსებობს, მაგრამ სომხეთიდან - საქართველოში არ არსებობას, ამიტომაც სომხური მხარეც დააწესებს ანალოგიურ გადასახადს.
ვის დააწვება ეს გადასახადი საავტომობილო გადამზიდავს - ანუ მცირე მეწარმეს, ეს არის მცირე მეწარმეობის ხელშეწყობა????
რა ეკონომიკურ გაანგარიშებას ემყარება გადასახადის 2.7 ჯერ გაძვირებას ???? არსებობს რაიმე დასაბუთება? - აცხადებს ექსპერტი "კომერსანტან".
კომერსანტი შეეცადა გადაემოწმებინა იფორმაცია. საკანონმდებლო მაცნეზე გამოქვეყნებულია ირაკლი ღარიბაშვილის ხელმოწერილი საქართველოს მთავრობის დადგენილება, რომლის მიხედვით, ავტოპარკის ღირებულება 20 წუთზე მეტი ხნით დგომისას ავტომობილის გამწევისთვის და მისაბმელისთვის ცალც-ცალკე 45 ლარია, ჯამში, ერთი სტანდარტული სატვირთო ავტომობილისთვის ავტოპარკში დგომის საფასური 90 ლარი გამოდის.
ჩვენ შევეცადეთ შემოსავლების სამსახურთან, ამ საკითხში გარკვევის მიზნით, დაკავშირებას, თუმცა უწყებაში დღეს დასვენების დღეა და ხვალ დარეკვა გვირჩიეს. ცხელ ხაზზე კი ჩვენს კითხვაზე პასუხი ვერ გაგვცეს.
თავის მხრივ, "სატრანსპორტო დერეფნის კვლევის ცენტრშიც" დაგვპირდნენ ამ საკითხის შესწავლას და პირველივე შესაძლებლობისთანავე, მაქსიმალურად ოპერატიულად, შევეცდებით გაგარკვიოთ დეტალებში.
ავტორი: ბელა გელაშვილი