საავტომობილო გზების დეპარტამენტი N4 ზონაში (ზონა მოიცავს ქალაქ რუსთავის, მცხეთის, დუშეთისა და გარდაბნის მუნიციპალიტეტებს) არსებული გზების შეკეთებისსთვის დამატებით 1,5 მილიონ ლარს გადაიხდის. როგორც სახელმწიფო შესყიდვების სააგენტო ვებგვერდზე განთავსებული ინფორმაციიდან ირკვევა, 2021 წლის 17 ივლისს გაფორმებული ხელშეკრულების შესაბამისად შპს “გზა და ხიდი “ ახორციელებს №4 ზონაში შემავალ საავტომობილო გზებზე მიმდინარე შეკეთების (მოვლა-შენახვის) და ზამთრის შენახვის სამუშაოებს, რომლის საკონტრაქტო ღირებულება შეადგენს 8 500 000 ლარს, ხოლო სამუშაოების შესრულების ვადა - 24 თვეს, რომელიც სრულდება 2023 წლის ივლისის შუა რიცხვებში.
თუმრაღა სახელშეკრულებო ღირებულება პრაქტიკულად ამოწურულია (2023 წლის 21 თებერვლის მდგომარეობით, ჯამურად, შესრულებულია 8 331 794,98 ლარის ღირებულების სამუშაოები), ხოლო დარჩენილი 168 205,02 ლარი არ არის საკმარისი, ხელშეკრულებით გათვალისწინებულ ვადაში, საავტომობილო გზების გამტარუნარიანობის შესანარჩუნებლად აუცილებელი მოცულობის და დასახელების სამუშაოების საწარმოებლად.
„ხელშეკრულების ფარგლებში, დაგეგმილ ვადაზე ადრე თანხების ამოწურვა გამოიწვია მიმდინარე წლის იანვარ-თებერვლის თვეებში, ხანგრძლივი პერიოდის განმავლობაში, კლიმატური პირობების მკვეთრმა გაუარესებამ, ჭარბმა ნალექმა და დაბალმა ტემპერატურამ, რის გამოც, ზონაში შემავალი გზების უმეტეს მონაკვეთებზე, საჭირო გახდა 24 საათიანი მორიგეობის გრაფიკით, დიდი მოცულობის გაწმენდითი სამუშაოების ჩატარება და ქვიშა-მარილის ნარევის ინტენსიური გამოყენება, რაც, ამჟამადაც მიმდინარეობს“, - განმარტავენ საავტომობილო გზების დეპარტამენტში.
აღსანიშნავია ისიც, რომ N4 ზონაში შემავალ საავტომობილო გზებზე მიმდინარე შეკეთების (მოვლა-შენახვის) და ზამთრის შენახვის სამუშაოების შესყიდვის მიზნით, დეპარტამენტის მიერ მიმდინარე წელს განხორციელდა რიგი საორგანიზაციო საკითხები, კერძოდ: გადაანგარიშდა და ექსპერტიზა ჩაუტარდა შესასრულებელი სამუშაოების ერთეულის ფასებს, დაზუსტდა სამუშაოების საორიენტაციო სახელშეკრულებო ღირებულებები და ზონაში შემავალ 4 მუნიციპალიტეტთან ერთობლივი შესყიდვის განხორციელების მიზნით, გაფორმდა მემორანდუმი. დღეის მდგომარეობით, სახელმწიფო შესყიდვების ერთიან ელექტრონულ სისტემაში გამოცხადებულია ერთობლივი ელექტრონული ტენდერი NAT230003831, სადაც, წინადადების მიღება სრულდება მიმდინარე წლის 20 მარტს.
„თუ გავითვალისწინებთ ზემოაღნიშნულ გარემოებებს, კერძოდ, მოქმედი ხელშეკრულების ღირებულების ამოწურვას, ასევე იმ ფაქტს, რომ სატენდერო პროცედურების შედეგად გამარჯვებული პრეტენდენტის გამოვლენას და მასთან ხელშეკრულების გაფორმებას დასჭირდება გარკვეული დრო, საჭიროა დროებითი მოვლა-შენახვის სამუშაოების დაუყოვნებლივ შესყიდვა, რათა, ზონაში შემავალ საავტომობილო გზებზე, უწყვეტად, შენარჩუნებული იქნას მოძრაობის გამტარუნარიანობა, ავტოტრანსპორტის უსაფრთხო და კომფორტული გადაადგილება“, აცხადებენ საავტომობილო გზების დეპარტამენტში.