„საავტომობილო ზეთის ბაზარზე საკმაოდ ნეგატიური მოცემულობაა. ეს ჩანს როგორც 10 თვის მონაცემის მიხედვით, ასევე ნოემბრის ტენდენციითაც. ის ერთადერთი ნავთობპროდუქტია, სადაც 2021 წლის 11 თვის განმავლობაში იმპორტი თითქმის თანაბარ დონეზეა წინა წლის ანალოგიურ პერიოდთან შედარებით, ხოლო ნოემბერში, წინა თვესთან შედარებით, კლება 10%-ს აჭარბებს, 11 თვის მონაცემით კი 16%-ს აღემატება, ვიდრე წინა წლის ანალოგიურ პერიოდში (იანვარი-ნოემბერი). საქმე ისაა, რომ საავტომობილო ზეთების ყველაზე დიდი მომწოდებელი გახდა ირანის ისლამური რესპუბლიკა, რაც მიუთითებს, რომ ადგილობრივ ბაზარზე კვლავინდებურად მომრავლებული და დიდი მოცულობითაა წარმოდგენილი უხარისხო საავტომობილო ზეთი. შარშან იგი იმპორტში ოთხეულს მიღმა იყო, წელს პირველ ადგილზე მოექცა, რაც დამაფიქრებელი ტენდენციაა. ეს ნიშნავს, რომ ადგილობრივ ბაზარზე დიდი რაოდენობითაა უხარისხო, არასათანადო ხარისხის და სტანდარტის პროდუქტი იყიდება. გარდა ამისა, საავტომობილო ზეთის ბაზარზე ფალსიფიკაციაც, სავარაუდოდ, მაღალ დონეზეა“, - ამბობს ვანო მთვრალაშვილი ,,კომერსანტთან“.
მთვრალაშვილი ასევე განმარტავს, რომ სინამდვილეში საავტომობილო ზეთი მაღალტექნოლოგიური წარმოების შედეგად მიიღება და იაფი ვერ იქნება. მისივე თქმით, ასეთ ფონზე ირანული პროდუქტის ხვედრითი წილის ზრდა ბაზარზე დაბალფასიანი პროდუქტის რაოდენობის ზრდაზე მიგვანიშნებს.
რაც შეეხება ოფიციალურ სტატისტიკას, 2021 წლის ნოემბერში საქართველოში საცხებ-საპოხი მასალების იმპორტმა შეადგინა 1,51 ათასი ტონა, რაც 0,18 ათასი ტონით, ანუ 10,6%-ით ნაკლებია ოქტომბრის მაჩვენებელთან (1,69 ათასი ტონა) შედარებით და 0,16 ათასი ტონით, ანუ 9,6%-ით ჩამორჩება გასული წლის ანალოგიური პერიოდის (1,67 ათასი ტონა) მონაცემებს.
მიმდინარე წლის ნოემბერში საცხებ-საპოხი მასალების იმპორტის ყველაზე დიდი მოცულობა განხორციელდა ირანიდან - 0,34 ათასი ტონა, რაც მთელი იმპორტის 22,5%-ს შეადგენს.
რაც შეეხება იმპორტს წლიურ ჭრილში, 2021 წლის იანვარ-ნოემბრის განმავლობაში საცხებ-საპოხი მასალების იმპორტმა შეადგინა 17,12 ათასი ტონა, რაც ფაქტობრივად იგივეა გასული წლის ანალოგიური პერიოდის მაჩვენებელთან (17,12 ათასი ტონა) შედარებით. 2021 წლის პირველი 11 თვის განმავლობაში საცხებ-საპოხი მასალების იმპორტის ყველაზე დიდი მოცულობა განხორციელდა ირანიდან - 2,86 ათასი ტონა, რაც მთელი იმპორტის 16,7%-ს შეადგენს.
მარი ჩიტაია