„ინფორმაცია არ გვაქვს როდის გაიხსნება სეზონი,“ - ამის შესახებ რადიო „პალიტრასა“ და „პალიტრანიუსის“ გადაცემაში „საქმე“ ჰოტელიერმა მაია მურაჩაშვილმა ზამთრის კურორტებზე სეზონის გახსნის შესახებ საუბრისას განაცხადა.
მისივე თქმით, გუშინ ინტერსიური თოვის შემდეგ გუდაურში გზა ჩაიკეტა და კურორტი ფაქტობრივად სრულად პარალიზებული იყო.
„საგზაო დეპარტამენტი მომზადებით არ შეხვდა, საჭირო ტექნიკა ადგილზე არ იყო და მას შემდეგ რაც ინტენსიური თოვა დაიწყო, სანამ ტექნიკის მობილიზება მოხდა, გზები ჩაიკეტა. გუშინ მთლიანად გუდაური იყო პარალიზებული. არა მხოლოდ ტურისტებმა ვერ შეძლეს ამოსვლა, არამედ მაღაზიებიც ვერ შეივსო. დღეს, დღის განმავლობაში უკვე გაიხსნა გზა და დაიწყო ხალხმა სასტუმროში შემოსვლა, თუმცა, გუშინ ჯავშნები გაგვიუქმდა. მართალია, გარკვეულ შემთხვევებში მოვახერხეთ ჯავშნის გადატანა, მაგრამ რიგ შემთხვევებში თანხის დაბრუნება მოგვიწია.
შემიძლია გითხრათ, რომ ტურისტული სექტორი მზად არის, თუმცა, სეზონი ჯერ არ გახსნილა. საბაგირო არ ჩართულა, შესაბამისად, თხილამურების გაქირავებაც არ ხდება. ახლა რა ჯავშნებიც გვაქვს არის ახალი წლის. ჩვენთან ვინც შემოდის - არის ხანგრძლივი დამსვენებელი, ვისაც დასვენება უნდა მთაში, სპორტული ტურიზმის მიმდევრები კი ჯერ არ გვყავს, რადგან ვერ ვაწვდით ვერც ზუსტ თარიღს გახსნასთან დაკავშირებით და ვერც ზუსტ მონაცემებს თუ რა ეღირება საბაგიროები. ამ ეტაპზე ხელისშემშლელი ფაქტორები არ არსებობს, ამიტომ არ ვიცი რატომ იგვიანებს სეზონის გახსნა, ფაქტია ჩვენ ინფორმაცია არ გვაქვს,“- აღნიშნა მურაჩაშვილმა.
bpn.ge