ეროვნულმა ბანკმა კომერციულ ბანკებს გენდერული მრავალფეროვნების გაუმჯობესების მიზნით ახალი ვალდებულებები განუსაზღვრა. ვალდებულებები გულისხმობს არაუგვიანეს 2023 წლის 1 ივნისისა, ბანკების სამეთვალყურეო საბჭოებში განსხვავებული სქესის წილი არანაკლებ 33%-ს უნდა შეადგენდეს, ხოლო არაუგვიანეს 2025 წლის 1 ივნისისა არანაკლებ 40%-ს.
ამასთან, კომერციული ბანკების კორპორაციული მართვის კოდექსს პირველად ემატება სარეკომენდაციო ჩანაწერი, ბანკების დირექტორატის შემადგენლობის მიმართ, რომლის მიხედვითაც დირექტორატში სასურველია განსხვავებული სქესის წარმომადგენელთა არანაკლებ 33%-იანი წილი.
სებ-ში აცხადებენ, რომ ცვლილება სრულ შესაბამისობაშია საერთაშორისო პრაქტიკებთან.
“გენდერული დივერსიფიკაციის მოთხოვნა (სამეთვალყურეო საბჭოს მინიმუმ 20%-ის განსხვავებული სქესის წარმომადგენლებისაგან დაკომპლექტება), “კომერციული ბანკების კორპორაციული მართვის კოდექსში“ პირველად 2018 წელს გაჩნდა. ამ მოთხოვნის შემოღება ძირითადად სხვადასხვა კვლევას დაეფუძნა. აღნიშნული კვლევების თანახმად, გენდერულ დივერსიფიკაციასა და რისკიანობას შორის უარყოფითი ურთიერთკავშირია. კვლევის მიხედვით, ქალები საშუალოდ, უფრო მეტად არიან რისკის მიმართ ნეგატიურად განწყობილნი, ვიდრე კაცები.
2018 წელს კორპორაციული მართვის კოდექსში ჩადებული მოთხოვნის შედეგად: 2018 წლიდან დღემდე ქალ წარმომადგენელთა წილი სამეთვალყურეო საბჭოებში 21%-ით გაიზარდა; ჯამურად, ქალ წარმომადგენელთა წილი (2022 წლის თებერვლის მდგომარეობით) 30% - ს შეადგენს, რაც დაწესებულ მოთხოვნას მნიშვნელოვნად აჭარბებს”,-აცხადებენ სებ-ში.
საბანკო ასოციაციის ხელმძღვანელი ალექსანდრე ძნელაძე განმარტავს, რომ ახალი მოთხოვნა ბანკებს ადმინისტრაციულ ხარჯებს გაუზრდის, თუმცა მიიჩნევს, რომ ქალთა წარმომადგენლობის ზრდა ბანკების სამეთვალყურეო საბჭროებში გარდაუვალი პროცესია. მისი თქმით, უკეთესი იქნებოდა თუ ზედამხედველი ამ ცვლილებისთვის მეტ დროს მისცემდათ და ბანკებს საბჭოების დაკომპლექტება ახალი წესით არა 2023, არამედ 2025 წლიდან მოუწევდათ.
“შინაარსობრივად ეს ძალიან კარგი ცვლილებაა. წინა ცვლილება, რაც 2018 წელს იქნა მიღებული საკმაოდ მტკივნეული აღმოჩნდა და ისეთი ბანკებისთვისაც კი გაურკვეული ცვლილებების წინაპირობა გახდა, რომლებიც ლონდონის საფონდო ბირჟაზე არიან წარმოდგენილნი. ახალი სტანდარტი საკმაოდ მაღალია და მსგავსი შესაძლოა ევროპის ზოგიერთ ქვეყანაშიც არ იყოს. ეს მდგრადი განვითარების კუთხით გადადგუმული ნაბიჯია და ადრე თუ გვიან მოგვიწევს ამ მიმართულებით წასვლა. რამდენად ოპტიმალური დროა ახლა იმისთვის, რომ ამ მიმართულებით კიდევ უფრო მეტი შეზღუდვები შემოვიდეს ეს კითხვა ჩნდება. ეს არის ბუნებრივია გარკვეული ადმინისტრაციული ხარჯიც და ამ მხრივ პრობლემაც. მარტივი არ არის სამეთვალყურეო საბჭოს წევრის ცვლილება და ამას კიდევ გარკვეული კრიტერიუმები ემატება. აქედან გამომდინარე, რა თქმა უნდა, სექტორისთვის იქნება გარკვეული უხერხულობა. მოსამზადებელი პერიოდი მეტი რომ ყოფილიყო უკეთესი იქნებოდა. ამას გარდა, დღევანდელ ვითარებაში რამდენად ლოგიკურია ამ შეზღუდვების შემოღება, რაც იწვევს გარკვეულ ადმინისტრაციულ ხარჯებსა და პრობლემებს, შესაძლებელი იყოს ეს გადაწყვეტილება 2023 წელს მიღებულიყო”,-აცხადებს ძნელაძე.
ასოციაციის ხელმძღვანელის თქმითვე, ეროვნულ ბანკს შეეძლო კომერციული ბანკებისთვის უფრო დიდი დრო მიეცა ცვლილების ამოქმედებისთვის, თუმცა ამბობს რომ ბანკებს აქვთ რესურსი ეს ცვლილება აღასრულონ. აღსრულების ნაწილში ძნელაძე რამდენიმე პრობლემას ასახელებს, მათ შორის კომერციული ბანკების უცხოელი მეწილეების მიერ სამეთვალყურეო საბჭოში საკუთარი წარმომადგენლობის დანიშვნას ეხება, რაც მისი თქმით, გაართულებს კვოტების დაცვის საკითხს. მეორე პრობლემა კი ზოგადად მსგავსი კვალიფიკაციის კადრების მოძიებას ეხება.
წყარო: bm.ge