საქართველოს საბანკო ასოციაციის პრეზიდენტის, ალექსანდრე ძნელაძის თქმით, საქართველოში დღეს კიბერსაფრთხეები როგორც ფინანსურ ინსტიტუტებს, ასევე ინდივიდუალურ მომხმარებლებს აქვთ და უნდა გვესმოდეს, რომ ამ მდგომარეობის გასაუმჯობესებელი ნაბიჯები სერვისების კომფორტულ მოხმარებას ამცირებს. ამის შესახებ ალექსანდრე ძნელაძე „ბიზნესპრესნიუსს“ ესაუბრა კონფერენცია კიბერრეალობა 2022-ზე, რომელიც დღეს, 6 ოქტომბერს გაიმართა კიბერუსაფრთხოების ცნობიერების თვის ფარგლებში.
„კიბერსაფრთხეები დღეს საქართველოში ორ ნაწილისგან შედგება: პირველი არის როგორც ფინანსური ინსტიტუტების, ასევე კომპანიების მიმართ და მეორე ინდივიდუალური მომხმარებლების კუთხით, რომლებიც კიბერთაღლითების მსხვერპლები ხდებიან. მხოლოდ საფინანსო ინსტიტუტის მხრიდან სხვადასხვა დაცვის მექანიზმების ჩადება არ არის საკმარისი იმისთვის, რომ სრულად დავიცვათ მომხმარებლები, თუ მათ ცნობიერებას სრულად არ ავამაღლებთ.
გარკვეული ნაბიჯები გადაიდგა ამ კუთხით, როგორც საბანკო, ასევე სხვა სექტორებში. თუმცა უნდა გვესმოდეს, რომ ყოველი მომდევნო ასეთი ნაბიჯი უსაფრთხოების გასაუმჯობესებლად ამცირებს კომფორტულ მოხმარებას დისტანციური სერვისების და აჩენს გარკვეულ ბარიერებს ინტერნეტბანკში თუ კონკრეტული ტრანზაქციის განხორციელების დროს. საბანკო სექტორი გადაჭარბებულადაც კი ახდენს თქვენს ინფორმირებას, ვგულისხმობ თუნდაც მესიჯის ზომას, როდესაც კოდი მოგდით, ინტერნეტბანკში შესვლისასაც ამან შეიძლება შემაწუხებელი ხასიათი მიიღოს“, - თქვა ალექსანდრე ძნელაძემ.
საბანკო ასოციაციის პრეზიდენტის თანახმად, მიუხედავად იმისა, რომ ბევრი ნაბიჯი გადაიდგა, ბანკისა და მომხმარებლების პასუხისმგებლობების განსასაზღვრად კანონმდებლობაზე მუშაობა კვლავ საჭიროა.
„ეს კონფერენცია ემსახურება, ერთის მხრივ, ინფორმირებას იმის შესახებ, თუ სად ვართ დღეს კიბერუსაფრთხოების ნაწილში და რა უნდა გავაკეთოთ, ხოლო მეორეს მხრივ, ინფორმაციის უფრო მეტად მიტანას მოსახლეობამდე, რამდენად მნიშვნელოვანია, რომ ცნობიერება ამაღლდეს მათი და არ მოხდეს შეცდომაში შეყვანა.
მომხმარებელთა უფლებების დაცვის ნაწილში მუდმივად მუშაობს ეროვნული ბანკის ცხელი ხაზი, გზავნიან საჩივრებს და არცერთი არ რჩება რეაგირების გარეშე. აქვე აღვნიშნავ, რომ საჩივრების რაოდენობა წლიდან წლამდე იზრდება, თუმცა განხილვას მხოლოდ 25% თუ ექვემდებარება. მაგრამ იმ საკითხთან დაკავშირებით, თუ რა არის ბანკის, ფინანსური ინსტიტუტის პასუხისმგებლობა და რა მომხმარებლის, ჯერ-ჯერობით, კანონმდებლობაზე კიდევ სამუშაოა“, - უთხრა ალექსანდრე ძნელაძემ „ბიზნესპრესნიუსს“.
ალექსანდრე ძნელაძე
