2022 წლის I კვარტალში საქართველოში მოქმედმა 14-მა კომერციულმა ბანკმა 413,5 მლნ ლარის წმინდა მოგება მიიღო, რაც წინა წლის ანალოგიურ პერიოდთან შედარებით 2.5 მილიონი ლარით მეტია.
ბანკების ასოციაციის პრეზიდენტი ალექსანდრე ძნელაძე „კომერსანტთან“ მიმდინარე წლის პირველ სამ თვეს აფასებს და მოლოდინებზე საუბრისას ამბობს, რომ საბანკო სექტორი წელს დაახლოებით 10%-ით გაიზრდება, თუმცა რეგიონში მიმდინარე ვითარებას გავლენა ექნება.
მიიღე ინფორმაცია უფრო სწრაფად „კომერსანტის“ Telegram-ზე.
„პირველი კვარტლის მონაცემებით ზრდის ტემპი შედარებით დაბალია იმ მოლოდინებთან რაც 2021 წლის ბოლოს არსებობდა. მიუხედავად ამისა, წლის განმავლობაში საბანკო სექტორი დაახლოებით 10%-იან ზრდას გეგმავს. კვლევების მიხედვით პოზიტიური შედეგი არის ქვეყნის ეკონომიკური ზრდის ტემპთან დაკავშირებითაც.
საბანკო სექტორის საკრედიტო პორტფელის მდგომარეობის ზრდის ტემპზე რუსეთის აგრესია და მაღალი ინფლაცია იმოქმედებს, მათ შორის მკაცრი მონეტარული პოლიტიკა რომელიც არსებობს ამ ტემპს შეამცირებს.
ზრდა მთლიანაც საკრედიტო პორტფელზე უმნიშვნელოა, მაგრამ სასიამოვნოა რომ ზრდა არის. ყველაზე ოპტიმისტური გათვლებით მოსალოდნელია, რომ მეოთხე კვარტალში მონეტარულმა განაკვეთმა დაიწყოს შემცირება. საკრედიტო პორტფელში ხარისხის კუთხით გაუარესებაზე საუბარი არ არის“, - აღნიშნავს ძნელაძე.
2022 წლის 1 აპრილის ფინანსური მაჩვენებლების მიხედვით, ყველაზე მაღალი - 206 მილიონიანი წმინდა მოგება „თიბისი ბანკს“ ჰქონდა, მეორე ადგილს კი „საქართველოს ბანკი“ 157.8 მლნ ლარის წმინდა მოგებით იკავებს. მესამე ადგილზე „ბაზის ბანკი“ დაწინაურდა, რომლის წმინდა მოგებამ 21 მლნ ლარი შეადგინა.