2022 წლის დეკემბერში, საბანკო სექტორის სადეპოზიტო ვალდებულებები წლიურად 19.11%-ით 7.12 მლრდ ლარით (თვიურად 1,708 მლნ ლარით) გაიზარდა და 44.4 მლრდ ლარი შეადგინა. რაც შეეხება სესხებს, გაცვლითი კურსის ეფექტის გამორიცხვით, სესხები წლიურად 12.1%-ით გაიზარდა.
„დეკემბერში წინა თვესთან შედარებით, ეროვნული ვალუტის სადეპოზიტო ვალდებულებები 1,036.0 მლნ ლარით (5.6%-ით) გაიზარდა და 19.4 მლრდ ლარი შეადგინა. აღნიშნული ზრდა, ძირითადად იურიდიული პირების დეპოზიტების მატებამ გამოიწვია. რაც შეეხება უცხოური ვალუტის დეპოზიტებს, წინა თვესთან შედარებით, 292.8 მლნ დოლარით გაიზარდა, რაც ძირითადად ფიზიკური პირების დეპოზიტების ზრდას უკავშირდება. დეკემბერში, სამთავრობო სექტორის დეპოზიტები 567.7 მლნ ლარით შემცირდა.
2022 წლის დეკემბერში, ლარით დაკრედიტება წლიურად 16.5%-ით, 24.7 მლრდ ლარამდე გაიზარდა და მთლიანი სესხების ზრდაში 8.1 პპ-იანი წვლილი შეიტანა. უცხოური ვალუტით დაკრედიტება (გაცვლითი კურსის ეფექტის გამორიცხვით) 8.0%-ით გაიზარდა და მთლიანი სესხების ზრდაში 4.0 პპ-იანი წვლილი შეიტანა. უცხოური ვალუტით დაკრედიტების კლება ძირითადად ბიზნეს სესხების ზრდის ტემპის შემცირებით არის განპირობებული. წინა თვესთან შედარებით, შენელებულია სამომხმარებლო და იპოთეკური სესხების ზრდის ტემპებიც“, — აღნიშნავენ ეროვნულ ბანკში.
რაც შეეხება საპროცენტო განაკვეთებს, 2022 წლის დეკემბერში დეპოზიტების საშუალო შეწონილი საპროცენტო განაკვეთები (მთავრობის გარეშე) წინა თვესთან შედარებით 0.6 პპ-ით გაიზარდა და 6.38% შეადგინა. ეროვნული ვალუტით დეპოზიტებზე საშუალო შეწონილი წლიური საპროცენტო განაკვეთი 0.4 პპ-ით გაიზარდა და 8.6% შეადგინა, ხოლო უცხოური ვალუტით გაცემულ დეპოზიტებზე პრაქტიკულად არ შეცვლილა და 0.9%-ს შეადგენს. დეკემბერში სესხების საშუალო შეწონილი საპროცენტო განაკვეთები კი წინა თვესთან შედარებით 0.2 პპ-ით შემცირდა და 13.1% შეადგინა. ეროვნული ვალუტით სესხებზე საშუალო შეწონილი წლიური საპროცენტო განაკვეთი 0.5 პპ-ით 16.2%-მდე შემცირდა, ხოლო უცხოური ვალუტით გაცემულ კრედიტებზე საპროცენტო განაკვეთი 1.01 პპ-ით გაიზარდა და 8.6%-ის დონეზეა.