მთავრობამ საბანკო სექტორისთვის მოგების გადასახადის 15-დან 20%-მდე გაზრდის გადაწყვეტილება მიიღო. გარდა ამისა, მიმდინარე წლიდან საბანკო სექტორისთვის აღრიცხვიანობა AFRS სტანდარტით იქნება სავალდებულო და ბუფერების შევსების ვადებიც მოახლოვდა. ამასთან, საქართველოს ეროვნული ბანკი კომეციული ბანკებისთვის ბუფერების მოთხოვნის ზრდას განიხილავს.
რა გავლენა ექნება ამ პროცესებს საბანკო სექტორზე და როგორ აისახება ეს მომხმარებელზე, ამ თემაზე საბანკო ასოციაციის პრეზიდენტმა ალექსანდრე ძნელაძემ „კომერსანტთან“ ისაუბრა.
„მოგების გადასახადის ფორმირებამ საბანკო სექტორისთვის საგადასახადო ტვირთის ზრდა გამოიწვია, ამავე პერიოდს დაემთხვევა აღრიცხვიანობის საერთაშორისო სტანდარტზე გადასვლა, რომელიც ასევე დამატებით წნეხს იწვევს საგადასახადო კუთხით. ხარჯის ზრდა ნიშნავს, რომ კაპიტალზე დამატებითი ზეწოლა იქნება. 2023 წელს სხვადასხვა ბუფერების შევსების ვადებიც მოდის, შესაბამისად აღნიშნული ზეწოლაც კაპიტალზეა, რაც იმას ნიშნავს რომ საბანკო სექტორის ზრდის ტემპის არსებულ დონეზე შენარჩუნებისთვის სისტემას მოუწევს ან დამატებითი კაპიტალის მოზიდვა ან შენელდება ზრდა.
მოგების გადასახადის 15% -დან 20 % - მდე ზრდის პარალელურად უქმდება დივიდენდის გადასახადი, თუმცა დივიდენდის გადასახადი არ იყო ბანკის გადასახადი, ეს იყო ინვესტორის გადასახადი. ამ შემთხვევაში 15-დან 20 %-მდე ზრდა და ესტონური მოდელის გაუქმება საბანკო სექტორისთვის საგადასახადო ხარჯს ავტომატურად ზრდის. თუმცა ამ ეტაპზე კონკრეტულ ხარჯზე საუბარი რთულია, მიმდინარეობს დათვლა.
აისახება თუ არა მომხმარებელზე და გაზრდის თუ არა მათ ხარჯს ეს საგადასახადო ცვლილება, ასე პირდაპირპროპორციულად, ამის თქმა რთულია, ეს ძალიან ბევრ რამეზეა დამოკიდებული, თუმცა მოდელია ასეთი, რომ თუ ხარჯები იზრდება, ამის დაკომპენსირება სხვა მეთოდებით ხდება“, — აღნიშნავს ალექსანდრე ძნელაძე.
საქართველოს ეროვნული ბანკის პრეზიდენტის კობა გვენეტაძის განცხადებით, მოგების გადასახადის ზრდა ფინანსური სექტორისთვის არანაირ გამოწვევას არ შექმნის, ეს არის ფისკალური გადაწყვეტილება, რომელიც სახელმწიფო ბიუჯეტს ემსახურება.
ფინანსთა სამინისტროს მიერ პარლამენტისთვის წარდგენილ საგადასახადო კოდექსში შესატანი ცვლილებების პროექტის განმარტებითი ბარათის თანახმად, საბიუჯეტო ეფექტი, რაც მოგების გადასახადის მატებას ექნება, 172 მილიონ ლარს შეადგენს.