საბერძნეთის ბეწვეულის მრეწველობა, რომელსაც საუკუნეების ისტორია აქვს, კრიზისის ზღვარზეა, მისი მთავარი ბაზრისთვის, რუსეთისთვის ევროკავშირის მიერ დაწესებული სანქციების გამო - იუწყება სააგენტო როიტერსი. სანქციების შედეგად შეწყდა ექსპორტი, რამაც გაყიდვების ვარდნა გამოიწვია. ამ და სხვა ფაქტორების გამო, ცხოველების დამცველები სექტორის სამომავლო კოლაფსზე ლაპარაკობენ.
ბეწვეულის კრიზისი განსაკუთრებით შეეხო საბერძნეთის ქალაქ კასტორიას, რომელიც საბერძნეთის ბეწვეულის მრეწველობის ისტორიული ცენტრია. ამ ქალაქში მოქმედ ასობით ბიზნესს სანქციებით აეკრძალა ბეწვეულის პროდუქციის ექსპორტი რუსეთში, ანუ საბერძნეთის მთავარ ბაზარზე. საბერძნეთი ერთ-ერთია ევროკავშირის რამდენიმე სახელმწიფოდან, სადაც კვლავ დაშვებულია ბეწვეულის ინდუსტრია, მიუხედავად ზეწოლისა ცხოველების დამცველებისგან, როგორც ქვეყნის შიგნით, ისე საერთაშორისო მასშტაბით.
ცხოველების დამცველები იმედოვნებენ, რომ რუსეთის ბაზრის დაკარგვა ხელს შეუწყობს ევროპული ბეწვეულის ბაზრის დასასრულს - ბაზრის, რომელიც უკვე მნიშვნელოვნადაა შემცირებული, ცხოველთა დაცვის კამპანიების და კორონავირუსის პანდემიის შედეგად.
ამასთან, სულ უფრო მეტი მოდის სახლი - მათ შორის Gucci და Prada - აცხადებს, რომ მომავალში აღარ გამოიყენებს ნამდვილ ბეწვს. აქტივისტები ამბობენ, რომ ყველა ეს ფაქტორი ხელსაყრელია მათი თქმით ამ მორალურად გაკოტრებული მრწეველობის დასასრულებლად.
რუსები, ტრადიციულად, მსხვილი მყიდველები იყვნენ. ომმა ეს, ცხადია, დაასრულა, რაც ძალიან კარგი ამბავია - ამბობს მარკ გლოვერი, პრესმდივანი ორგანიზაცისა Fur Free Alliance, რომელიც ცხოველთა დაცვის 50 ორგანიზაციას ერთიანებს მსოფლიოს გარეშემო.
1990-იანი წლებიდან საბერძნეთის ბეწვეულის მრეწველობის ბიზნეს-მოდელი კონცენტრირებული იყო მდიდარ რუს მყიდველზე, და საბერძნეთის ბეწვის ფედერაცია ამბობს, რომ ახალ ბაზრებზე, მაგალითად სამხრეთ კორეაში შეღწევა რთული ამოცანა იქნება. სანქციები მაღაზიებს ბეწვის მიყიდვას რუსი ტურისტებისთვისაც უკრძალავს, რადგან ბეწვი ფუფუნების საქონლად არის მიჩნეული.
ჯერჯერობით სახელმწიფო ეხმარება ქვეყნის 2000, ძირითადად საოჯახო ბეწვეულის ბიზნესს, რომლებშიც 4000-მდე ადამიანი მუშაობს. ეს დახმარება სექტემბრამდეა ძალაში და ამ ბიზნესებს საშუალებას აძლევს თავი აარიდონ თანამშრომელთა გათავისუფლებას, სახელმწიფოს მხრიდან მათი ხელფასების სუბსიდირების გზით.
ბეწვეული საბერძნეთის 10 მთავარ საექსპორტო საქონელში შედის, თუმცა ის წლების განმავლობაში ისედაც იკლებდა მოცულობით. შარშან რუსეთში ექსპორტმა შეადგინა 14 მილიონი ევრო - რაც 55 მილიონი ევროთი ნაკლებია 2017 წლის მონაცემზე, საბერძნეთის სტატისტიკის ცენტრის მონაცემებით.
radiotavisupleba.ge