დღეს თსუ-ს რექტორმა გიორგი შარვაშიძემ და ადმინისტრაციის ხელმძღვანელმა ლაშა  საღინაძემ თსუ-ის ყოფილი ბუღალტრის დაკავების ფაქტთან დაკავშირებით მედიასთან პირველი კომენტარი გააკეთეს, მათი თქმით ფინანსური დანაშაულის ნიშნები თავდაპირველად უნივერსიტეტის შიდა აუდიტმა გამოავლინა და მასალები პროკურატურას გამოძიებისთვის გადაუგზავნა.

 „თუ როგორ შეძლო ბუღალტერმა ამხელა თანხის მითვისება – ამას დაადგენს გამოძიება. ეს მოკვლევა თსუ-ის შიდა აუდიტის სამსახურმა ჩაატარა, დეკემბრის თვეში გადავეცით პროკურატურას. საბოლოოდ, სასამართლო დაადგენს, არის თუ არა ეს ადამიანი დამნაშავე”, – ამბობს რექტორი „TV პირველთან” საუბრისას.

 საღინაძე აცხადებს, რომ დაკავებული ბუღალტერი 10 წელზე მეტ  ხანს  მუშაობდა და რამდენიმე  თვეა  მათი თანამშრომელი აღარ  არის, მისივე  თქმით გადარიცხული იყო მცირე მოცულობის თანხები, რაზეც ეჭვის მიტანა, პრაქტიკულად, შეუძლებელი იყო, თუმცა გადამოწმებისა და გარკვეული ფილტრაციის შედეგად გამოვლინდა გარკვეული უზუსტობები

„თსუ-ის ფინანსურმა დეპარტამენტმა 2021 წლის დეკემბერში გამოავლინა გარკვეული გადაცდომები, მოგვმართა ადმინისტრაციას, ჩვენ დავავალეთ ჩვენი შიდა აუდიტის სამსახურს შესაბამისი ფაქტის მოკვლევა, მოკვლევის ეტაპზე გამოვლინდა დანაშაულის ნიშნები, რომელიც 2022 წლის მარტის თვეში გადაგზავნილი იქნა პროკურატურაში, რის შემდგომაც შესაბამისმა ორგანომ ჩაატარა გამოძიება.

აქ იყო გადარიცხული მცირე მოცულობის თანხები, რაზეც ეჭვის მიტანა, პრაქტიკულად, შეუძლებელი იყო, თუმცა გადამოწმებისა და გარკვეული ფილტრაციის შედეგად გამოვლინდა გარკვეული უზუსტობები.

ამ შემთხვევაში გადარიცხვის დროს უთითებდნენ სხვა პირს, ვისზეც რეალურად სწორი იქნებოდა, რომ ჩარიცხოდა თანხა, თუმცა ანგარიშის ნომერი იყო სხვა”, – აღნიშნა საღინაძემ.

საქართველოს პროკურატურამ, სამსახურებრივი მდგომარეობის გამოყენებით, დიდი ოდენობით თანხების მითვისებისა და კრედიტის უკანონოდ მიღების ფაქტზე, „ივანე ჯავახიშვილის სახელობის თბილისის სახელმწიფო უნივერსიტეტის“ ყოფილი ბუღალტერი და მასთან დანაშაულებრივ კავშირში მყოფი პირი დააკავა.

როგორც პროკურატურაში აცხადებენ, უწყებამ აღნიშნულ საქმეზე გამოძიება სახელმწიფო აუდიტის სამსახურისა და უნივერსიტეტის შიდა აუდიტის მომართვების საფუძველზე დაიწყო.

პროკურატურის ცნობით, საქმეზე მოპოვებული მტკიცებულებებით დადგინდა, რომ თბილისის სახელმწიფო უნივერსიტეტის ყოფილმა ბუღალტერმა, ამ პოზიციაზე მუშაობის პერიოდში, სამსახურებრივი მდგომარეობის გამოყენებით, უნივერსიტეტის ანგარიშიდან მასთან დაკავშირებული პირების საბანკო ანგარიშებზე გადარიცხა და მიითვისა დიდი ოდენობით – 165 000 ლარი.

თაკო კვაჭანტირაძე