გარემოს დაცვისა და სოფლის მეურნეობის სამინისტროს დაქვემდებარებული „ნარჩენების მართვის ბიზნეს ასოციაცია“ 2023 წლის 1-ლი იანვრიდან ნარჩენი ზეთების, საბურავებისა და აკუმულატორების შეგროვება-უტილიზაციის ვალდებულებას იღებს.
„კომერსანტი“ საქართველოში საბურავების გადამამუშავებელი ერთადერთი საწარმოს დირექტორს ზურა ბაზღაძეს ესაუბრა, რომელმაც განაცხადა, რომ კანონი ერთი წელია უკვე ძალაშია, მაგრამ ამ დრომდე მათ არავინ დაკავშირებია და მათი საწარმოს მიმართ არანაირი დაინტერესება არ ყოფილა.
„TRC-ის შესახებ იციან, მაგრამ გამოხმაურება არ გვქონია. მთავარია, რამდენად შეძლებენ იმის გაკეთებას, რის პასუხისმგებლობასაც იღებენ და რამდენად მოახერხებენ ნარჩენების შეგროვებას (ამ შემთხვევაში საბურავების შეგროვებას ვგულისხმობ) და მერე მის გადამამუშავებლამდე მიტანას. ბევრი რამაა კანონით აკრძალული, მაგალითად - საბურავის დაწვა, დამარხვა, მაგრამ ამას აკეთებენ. მთავარი პრობლემა კანონის აღსრულებაა. საქართველოში ამ საკითხში ვიჭედებით ხოლმე,“ -აცხადებს ზურაბ ბაზღაძე.
საბურავების გადამამუშავებელი საწარმო TRC-ის დირექტორის თქმით, საქართველოში წელიწადში დაახლოებით 11 მილიონი კგ მეორადი და 6 მილიონი კგ ახალი საბურავი შემოდის. მათი საწარმო, ამ დრომდე, მხოლოდ 5-10 %-ის გადამუშავებას ახერხებდა. ბოლო 2 წლის განმავლობაში, USAID-ის, 800 000 ლარის ოდენობის, 2 გრანტი მიიღეს და მესამე თანამედროვე დანადგარის მონტაჟს ნოემბრის ბოლოს დაასრულებენ, რის შემდეგაც TRC-ი წელიწადში შეგროვილი ნარჩენი საბურავების 20-25%-ის გადამუშავებას შეძლებს და 6-7 თვეში საექსპორტო ნედლეულიც ექნება.
ძირითადი საექსპორტო პროდუქცია რეზინის ფხვნილია, რომელიც რეზინის აღდგენასა და რეზინის წარმოებაში, თუნდაც საბურავების დასამზადებლად გამოიყენება. როგორც ზურა ბაზღაძემ განაცხადა, ამჟამად მოლაპარაკებები თურქულ კომპანიასთან აქვთ. ქართულ ბაზარზე TRC-ის ერთ-ერთი ყველაზე დიდი გამოწვევა ნდობის ფაქტორი იყო, მაგრამ კომპანიამ საფრანგეთში მოახდინა საწარმოს სერტიფიცირება, რამაც კომპანიის საქმიანობის ზრდას შეუწყო ხელი. ხუთი წლის განმავლობაში საბურავების გადამუშავებით მიღებული კაუჩუკის გრანულით რამდენიმე საერთაშორისო დონის სტადიონი, სარბენი ბილიკი, მულტიფუნქციური სტადიონი და კორტი მოეწყო.
მოამზადა მაკა ბიბილაშვილმა