უკრაინაში რუსეთის მიერ განხორციელებული აგრესიული საომარი მოქმედებების გამო, აშშ-მა, დიდმა ბრიტანეთმა, ევროკავშირმა და სხვა ქვეყნებმა რუსულ საბანკო სისტემას ფინანსური სანქციები დაუწესა. სანქციებით გათვალისწინებული მოთხოვნების შესრულების ვალდებულების შესახებ მითითება ეროვნულმა ბანკმა საქართველოს საფინანსო სექტორის წარმომადგენლებსაც, მათ შორის „ვითიბი ბანკ ჯორჯიასაც“ მისცა, რის შედეგადაც „ვითიბიმ“ საცალო პორტფელი „ბაზისბანკზე“ გაასხვისა.

„ვითიბი ბანკ ჯიორჯიას“ უმთავრესი მიზანია, მაქსიმალურად დაიცვას საკუთარი დეპოზიტარების და მომხმარებლების ინტერესები და სტაბილურობა. სწორედ ამიტომ, ბანკმა მიიღო გადაწყვეტილება, გაასხვისოს არსებული საცალო, სასესხო და სადეპოზიტო პორტფელი ბაზისბანკზე. „ვითიბი ბანკ ჯორჯიას ყველა ფიზიკური პირი მეანაბრე და მსესხებელი გახდება ბაზისბანკის მომხმარებელი და საბანკო მომსახურებას მიიღებს როგორც ბაზის ბანკის, აგრეთე ვითიბი ბანკის ფილიალებში“, — აცხადებენ ბანკში.

როგორც საქართველოს ეროვნულ ბანკში განმარტავენ, მუშაობა პორტირებაზე დაწყებულია და დღეიდან ვითიბი ბანკის ფიზიკურ პირ მეანაბრეებსა და მსესხებლებს, როგორც  „ვითიბი ბანკის“ ფილიალებში, ასევე „ბაზისბანკის“ ფილიალებში, „ბაზისბანკი“ გაუწევს მომსახურებას, ხოლო ეტაპობრივად უკვე მოხდება მათი „ბაზისბანკში“ პორტირება. რაც შეეხება დეტალებს, მათ შორის ბარათების ჩანაცვლებასთან დაკავშირებით, სებ-ში იმედოვნებენ, რომ ეს პროცესი მაქსიმალურად სწრაფად მოხდება.

„ეროვნული ბანკის ერთ-ერთი მთავარი ამოცანაა ფინანსური სექტორის სტაბილურობის უზრუნველყოფა. ამ მანდატის ფარგლებში, საფინანსო სექტორის მეანაბრეთა ინტერესების დაცვა ჩვენი მთავარი პრიორიტეტია. დღეიდან, სს ვითიბი ბანკ ჯორჯიას ფიზიკურ პირ მსესხებლებს და დეპოზიტარებს მოემსახურება სს ბაზისბანკი.  ყველა დეპოზიტარის ინტერესი დაცული იქნება, ხოლო მოთხოვნები სრულად დაკმაყოფილებული. ეროვნული ბანკი ყოველთვის მოქმედებს საერთაშორისო რეზოლუციებით განსაზღვრულ სტანდარტებთან სრულ შესაბამისობში “, - აღნიშნავენ ეროვნულ ბანკში.

საქართველოს საბანკო ასოციაცია „ვითიბი ბანკ ჯორჯიას“ მიერ საცალო პორტფელის „ბაზისბანკზე“ გასხვისებასთან დაკავშირებით აცხადებს, რომ „ვითიბი ბანკ ჯორჯია“ განაგრძნობს ოპერირებას და იურიდიული პირების მომსახურებას. მისი მომხმარებელი ფიზიკური პირები კი ხდებიან ბაზისბანკის მომხმარებლები და დღეიდან ეტაპობრივად, მომსახურებას მიიღებენ როგორც ვითიბი ბანკ ჯორჯიას, ასევე ბაზისბანკის ფილიალებში.

აღსანიშნავია, რომ „ბაზისბანკში“ „ვითიბი ბანკი ჯორჯიას“ მომხმარებლების 600 მილიონის სასესხო პორტფელი და 500 მილიონის დეპოზიტი იქნა პორტირებული.

ნინო თამაზაშვილი