მიმდინარე თვის 7 დღეში საქართველომ ექსპორტზე 32,03 მლნ კვტ/სთ ელექტროენერგია გაიტანა. ელექტროენერგეტიკული ბაზრის ოპერატორის ვებგვერდზე განთავსებული ოპერატიული ინფორმაციიდან ირკვევა, რომ ივლისში საქართველომ ელექტროენერგიის ექსპორტი თურქეთსა და აზერბაიჯანში განახორციელა. სტატისტიკური მაჩვენებლების მიხედვით, მიმდინარე თვეში ექსპორტი არ ფიქსირდება რუსეთის და სომხეთის მიმართულებით. 1-7 ივლისს საქართველოში არც ელექტროენერგიის იმპორტი არ ფიქსირდება.
ამ დროისათვის აზერბაიჯანში ექსპორტი 330 კვ ეგხ გარდაბანი-ს მეშვეობით განხორციელდა, სულ 7 დღეში საქართველომ აზერბაიჯანს 15,47 მლნ კვტ/სთ ელექტროენერგია მიაწოდა.
რაც შეეხება თურქეთს, 7 დღეში სულ ექსპორტირებულია 16,58 მლნ კვტ/სთ ელექტროენერგია. თურქეთის მიმართულებით ექსპორტი 400 კვ ეგხ მესხეთი-თ ხორციელდება.
ექსპორტის გარდა თურქეთისა და აზერბაიჯანის მიმართულებით ფიქსირდება ელექტროენერგიის ტრანზიტიც, რომელმაც მთლიანობაში 106,36 მლნ კვტ/სთ-ს შეადგინა.
ესკო-ს საიტზე ამ დროისათვის საქართველოს 2022 წლის ელექტროენერგიის ბალანსის იანვარ-მაისის დაზუსტებული მონაცემებია განთავსებული, საიდანაც კარგად ჩანს, რომ საქართველომ ხუთ თვეში სულ ექსპორტზე 272.1 მლნ კვტ/სთ ელექტროენერგია გაიტანა, ექსპორტის მხრივ ყველაზე მოთხოვნადი მაისის თვე აღმოჩნდა, რადგანაც მთლიანი ექსპორტის დიდ ნაწილი სწორედ მაისზე მოდის - 269.358 მლნ კვტ/სთ.
იანვარ-მაისის მაჩვენებლებით ირკვევა, რომ საქართველოში წარმოებული ელექტროენერგიის მთავარი საექსპორტო ბაზარი თურქეთია, სადაც საანგარიშო პერიოდში 219.8 მლნ კვტ/სთ ელექტროენერგიის ექსპორტი განხორციელდა. მეორე ადგილზეა სომხეთი, სადაც ხუთ თვეში 43.5 მლნ კვტ/სთ ელექტროენერგია გავიდა. მესამე ადგილს აზერბაიჯანი იკავებს (8.8 მლნ კვტ/სთ).
იანვარ-მაისში საქართველოს გავლით გატარებული ელექტროენერგიის ბალანსში მოწინავე პოზიციაზე ისევ თურქეთია. ქვეყანამ საქართველო ტრანზიტად 353.7 მლნ კვტ/სთ ელექტროენერგიის მისაღებად გამოიყენა, მაშინ როდესაც საანგარიშო პერიოდში საქართველოს ელექტროენერგიის მთლიანი ტრანზიტი 615.8 მლნ კვტ/სთ იყო.