1-ლი იანვრიდან ნარჩენების მართვის ბიზნეს ასოციაცია ნარჩენი ზეთების, საბურავებისა და აკუმულატორების ამოღებას იწყებს. როგორც რადიო „კომერსანტის“ ეთერში ნარჩენების მართვის ბიზნეს ასოციაციის აღმასრულებელმა დირექტორმა ვანო მთვრალაშვილმა განაცხადა, ამ მიმართულებით, მთავარი გამოწვევა ამ ნარჩენების უტილიზაცია-გადამუშავებაა, რადგან სახელმწიფოში მეორადი საბურავების გადამამუშავებელი სერიოზული სიმძლავრის საწარმო არ არსებობს, იგივე მდგომარეობაა ზეთებთან დაკავშირებითაც.
„სახელმწიფოს ამ მიმართულებით ამბიციური გეგმა აქვს. ჩვენი კანონმდებლობა, ნარჩენების მართვასთან დაკავშირებით, თითქმის ისეთივეა, როგორც ევროკავშირის წამყვანი ქვეყნების (შვედეთის მოდელი გვაქვს აღებული). თუმცა, ამ კანონმდებლობის აღსრულება მარტივი არ იქნება. საბურავების შემთხვევაში ჩვენთვის დიდ სირთულე იმის გადაწყვეტაა, შეგროვების შემდეგ რა გავაკეთოთ. ამ ეტაპზე გამოსავალი მათი დასაწყობებაა,“ განაცხადა ვანო მთვრალაშვილმა.
ვანო მთვრალაშვილის თქმით, ნარჩენების ამოღების მოცულობაც რეგლამენტირებულია. მაგალითად: 2023 წელს ნარჩენი ზეთის 15%-ი და საბურავის - 20 %-ი უნდა ამოიღონ. წლების განმავლობაში ეს მოცულობა გაიზრდება. ამ ეტაპზე ნარჩენების შეგროვების ცენტრები იქმნება და სამოქმედო გეგმის შემუშავება ხდება.
„წელიწადში საქართველოში 30 000 ტონა საბურავი შემოდის, აქედან 20-25 000 ტონა მეორადია. თუ გავითვალისწინებთ იმას, რომ საქართველოში საბურავების უტილიზაცია არ ხდებოდა და ნარჩენი საბურავები ქვეყნის მასშტაბითაა მიმობნეული, მისი მთლიანი მოცულობა გაცილებით მეტია. ამ პროცესს მარტო ბიზნესის იმედზე თუ დავტოვებთ, ძალიან გართულდება საქმე. პროცესში სახელმწიფოც აქტიურად უნდა მონაწილეობდეს“, განაცხადა ვანო მთვრალაშვილმა.
მოამზადა მაკა ბიბილაშვილმა