ევროკავშირის კანდიდატი ქვეყნის სტატუსის თვითშეფასების კითხვარში რამდენიმე შეკითხვა სადაზღვევო სექტორს ეხება. საქართველოს მთავრობამ უნდა მიუთითოს სექტორის შესახებ არსებული ზოგადი მონაცემები.
რამდენად აკმაყოფილებს საქართველოს სადაზღვევო ბაზრის მდგომარეობა ევროკავშირის მოთხოვნებს, ამ თემაზე „კომერსანტი“ დაზღვევის ასოციაციის პრეზიდენტს დევი ხეჩინაშვილს ესაუბრა.
მიიღე ინფორმაცია უფრო სწრაფად „კომერსანტის“ Telegram-ზე.
„ის, რომ სადაზღვევო ბაზარზე სახარბიელო მდგომარეობა არ არის, აშკარაა. არასიცოცხლის დაზღვევა არის მშპ-ს დაახლოებით 2.2-2.5%. ნორმალურად რომ ჩაითვალოს ბაზრის მოცულობიდან გამომდინარე, არასიცოცხლის ბაზარი უნდა იყოს 1.3-1.5 მლრდ ლარი, ჩვენი კი ამის ნახევარია. მარტივად, ასეთი პარამეტრით რომ მივუდგეთ, სადაზღვევო ბაზარი არის სუსტი და არ უზრუნველჰყოფს მისი მოსახლეობის თუ ბიზნესის კარგად დაცვას.
აქედან გამომდინარე ევროკავშირი იტყვის, რომ ქართულ სადაზღვევო ბაზარზე რაღაცეები არის გამოსასწორებელი, ერთ-ერთი მოთხოვნა, რაც ევროკავშირიდან წლებია გვაქვს, არის ავტომფლობელთან პასუხისმგებლობის სავალდებულო დაზღვევის გაშვება საქართველოში. ეს არის ერთ-ერთი გზა იმისა, რომ ბაზრის მოცულობა და მოსახლობის და ეკონომიკის დაცულობა გაიზარდოს. ჩვენი ბაზრის მოცულობას შეადარებენ ნორმალურ პარამეტრებს და იტყვიან, რომ არ არის თქვენი დაცულობა იმ დონეზე, რომელზეც უნდა იყოს, ჩვენ გეუბნებით ამისთვის რაც უნდა გააკეთოთ, მაგრამ...
ავტომფლობელების დაზღვევა მოგვცემს დამატებით 200 მლნ ლარს, გაშუალედებურად კიდევ სადაზღვევო კულტურის განვითარებას შეუწყობს ხელს და სხვა რაღაცეებს აამუშავებს. ევროკავშირული პროექტის ფარგლებში თითქოს დაჩქარებული წესით განიხილება ამ დაზღვევის მიღება და ის ციფრებიც, რაც ახლა კითხვარში იქნება, მომავალ წელს უფრო გაუმჯობესდება“, - ამბობს დევი ხეჩინაშვილი.
ევროკომისარმა ოლივიე ვარჰეიმ საქართველოს საგარეო საქმეთა მინისტრს, ილია დარჩიაშვილს ევროკავშირის კანდიდატი ქვეყნის სტატუსის თვითშეფასების კითხვარი 11 აპრილს გადასცა. საქართველოს მთავრობამ გამოაქვეყნა 369 კითხვისგან შემდგარი დოკუმენტის პირველი ნაწილი, რომელზე გასაცემ პასუხებზეც დამოკიდებულია საქართველოსთვის EU-ს კანდიდატის სტატუსის მინიჭების საკითხი. ევროკავშირის კანდიდატი ქვეყნის სტატუსის თვითშეფასების შევსებული კითხვარი ევროკომისიას მაისში გადაეცემა.
ნინო თამაზაშვილი