დღეს ტექნოპარკში სადაზღვევო ბროკერი „ფრანის“ პრეზენტაცია გაიმართა. „ფრანი“ პირველი ქართული ციფრული სადაზღვევო სტარტაპია, რომელსაც უახლოეს მომავალში გლობალურ ბაზარზე გასვლის გეგმები აქვს. მულტიფუნქციური, მომხმარებლის სურვილებზე მორგებული სადაზღვევო ბროკერი მომხმარებელს სხვადასხვა სერვისებს სთავაზობს.
სადაზღვევო ბროკერი „ფრანის“ დამფუძნებელმა გიორგი ჩაჩუამ რადიო „კომერსანტის“ დილის ეთერში განაცხადა, რომ ამ ეტაპზე „ფრანთან“ 9 სადაზღვევო კომპანია თანამშრომლობს და უახლოეს პერიოდში სრულად მოიცავენ იმ კომპანიებს, ვისაც ბაზარზე ამ სახით უნდა ოპერირება.
სტარტაპმა შარშან GITA-ს 150 000 ლარიანი გრანტი მიიღო, მანამდე - 15 000-იანი. გიორგი ჩაჩუას თქმით, soft-ის დეველოპმენტი დაასრულეს და პლატფორმა 2 პროდუქტით დაიწყებს ოპერირებას, რამდენიმე დღეში დაემატება ჯანმრთელობის, ქონების, კრიტიკული დაავადებების დაზღვევა და ყველა იმ პროდუქტს მოიცავენ, რომელიც შეიძლება არსებობდეს ფიზიკური კლიენტებისთვის.
„დღეს ვიწყებთ სამოგზაურო დაზღვევით და პასუხისმგებლობის დაზღვევა იქნება მეორე პროდუქტი, რომელიც ავტომფლობელთა პასუხისმგებლობის დაზღვევას ეხება. სამოგზაურო დაზღვევა ყველას გვჭირდება. ვფიქრობ, რომ ამ პროდუქტით პლატფორმის ცნობადობას გავზრდით. რამდენიმე დღეში პლატფორმას დაემატება მესამე პირის პასუხისმგებლობის დაზღვევა, შემდეგ ჯანმრთელობის დაზღვევა ინდივიდუალური მიმართულებით, ქონების დაზღვევა, კრიტიკული დაავადებების დაზღვევა და ყველა იმ პროდუქტს მოვიცავთ, რომელიც შეიძლება არსებობდეს ფიზიკური კლიენტებისთვის. გვექნება ის პროდუქტები, რომლებიც რისკების მხრივ არ არის დახუნძლული. ჩვენთან არ იქნება ისეთი პროდუქტები რომლებიც 1 და 2 დღეს საჭიროებს რისკების გასაანალიზებლად“ - აცხადებს გიორგი ჩაჩუა.
მისი თქმით, „ფრანის“ მოდელი გულისხმობს იმას, რომ ყველა სადაზღვევო კომპანია, რომელსაც შეუძლია ციფრული სერვისებით წვდომა ერთ პლატფორმაზე იყოს წარმოდგენილი და მომხმარებელმა თავის სურვილებზე მორგებული სადაზღვევო პაკეტი შეარჩიოს.
„ჩვენი სისტემა ავტომატურად დაუგენერირებს მომხმარებელს ისეთ შეთავაზებას, რომელიც მის მოთხოვნაზეა მორგებული. ორი flow გვაქვს, ერთი სტანდარტული ბროკერის flow, როცა ჩვენ ვთავაზობთ მომხმარებელს კონკრეტულ სადაზღვევოს, მეორე - თვითონ შეუძლია შეარჩიოს ნებისმიერი კომპანიის შეთავაზებები.
ძალიან მნიშვნელოვანი არის ის, რომ onboarding-დან დაწყებული ყველაფერი ხდება ჩვენს პლატფორმაზე, არანაირი გადამისამართება არც ერთ სადაზღვევოს ვებგვერდზე არ ხორციელდება, როგორც დარეგისტრირება, ის პოლისის მიღება. მომხმარებელს ექნება კაბინეტი, სადაც წვდომა ექნება შეძენილ პოლისზე, ტრანზაქციებზე და ა.შ. როგორ ინტერნეტბანკში გვაქვს სერვისებზე წვდომა, ასეა აქაც ოღონდ დაზღვევის მიმართულებით“, - აცხადებს გიორგი ჩაჩუა
მისი თქმით, საიტს 2-3 თვეში, მაისიდან აპლიკაციაც დაემატება. გლობალურ ბაზარზე გასვლას კი წელიწადში, წელიწად ნახევარში გეგმავენ. მათი სამიზნე პირველ რიგში ევროკავშირის ქვეყნებია.
„რაც ყველაზე მნიშვნელოვანია, მსგავსი ციფრული სადაზღვევო ბროკერის სერვისი, რომელიც მომხმარებელს მთელ სერვისს სრულად ონლაინ სთავაზობს, ევროპის ბაზარზე არ არსებობს და ვფიქრობ, ჩვენი შემდეგი ნაბიჯი იქნება ევროკავშირის ბაზარი, რაც მომავალი წლის გეგმა იქნება. მეზობელ ქვეყნებში არ არის განვითარებული სერვისების ნაწილი, შესაბამისად იქ ჯერ ადრეა მსგავსი პლატფორმა. თუმცა, რეგიონული ბაზრები საინტერესოა და დავაკვირდებით, თუ ციფრული სერვისები იქ უფრო მეტად განვითარდება, ვიფიქრებთ რეგიონის ქვეყნებში შესვლას“, - აცხადებს გიორგი ჩაჩუა.