2021 წლის განმავლობაში საქართველოს სადაზღვევო სექტორის მოგებამ 172 მილიონი ლარი შეადგინა, წმინდა მოგებამ კი 39,9 მილიონი ლარი, რაც წინა წლის ანალოგიურ პერიოდთან შედარებით თითქმის 16%-ით არის შემცირებული. აღსანიშნავია, რომ 2020 წლის 12 თვეში სადაზღვევო ბაზრის წმინდა მოგებამ 47.6 მილიონი ლარი შეადგინა.

სადაზღვევო კომპანია „გლობალ ბენეფიტს ჯორჯიას” გენერალური დირექტორი ნინო კობახიძე კომპანიების წმინდა მოგების შემცირების მიზეზებს „კომერსანტთან“ განმარტავს.

„სადაზღვევო ბაზარი არ იზრდება. არ არის მზარდი არც კორპორაციული ბაზარი, საცალო გაყიდვების კუთხითაც ინტერესი ძალიან დაბალია გამომდინარე იქიდან, რომ სამედიცინო დაზღვევა არ არის პოპულარული, რადგან სახელმწიფო დაზღვევა ფარავს კერძო სადაზღვევო კომპანიების პროდუქტს, თუ ადამიანს კერძო დაზღვევა აქვს, ვარდება სახელმწიფო დაზღვევიდან, ეს კი ბარიერს ქმნის. რაც შეეხება არსებულ პორტფელებს, ფასები არ იზრდება. სახელმწიფო, რომელიც არის შემსყიდველი, ცდილობს შეამციროს ფასი და არ გაზარდოს.

ეს 40 მილიონის მოგება, რაც წერია, ძირითადად კურსთა შორის სხვაობით არის ხოლმე როგორც წესი გამოწვეული, დეპოზიტები დოლარში თუ ვინმეს აქვს განთავსებული. ზოგადად სადაზღვევო სექტორის მოგება მიზერულია, ახალი კორპორაციული კლიენტები არ გვყავს, ბაზარი არ იზრდება და კოვიდის ფონზე ეს მინიმალურიც გვიკვირს. კოვიდ პანდემიამ სადაზღვევო ინდუსტრიას თავისი დაღი დაასვა და ბიზნესებმა, რომლებიც პანდემიამ ყველაზე მეტად დააზარალა, შეამცირეს სადაზღვევო პრემიები. სიმართლე გითხრათ, უფრო დიდ შემცირებას ველოდი“, - აცხადებს ნინო კობახიძე.

2021 წლის განმავლობაში საქართველოს სადაზღვევო სექტორის მიერ მოზიდულმა სადაზღვევო პრემიამ პირდაპირი დაზღვევის საქმიანობიდან შეადგინა 772,7 მილიონი ლარი. ბოლო მონაცემებით, სადაზღვევო კომპანიების აქტივების ჯამური მოცულობა შეადგენს 985,4 მილიონ ლარს, ხოლო კაპიტალი 324,1 მილიონ ლარს. აღსანიშნავია, რომ 2020 წლის 31 დეკემბრის მდგომარეობით კომპანიების აქტივები - 915.8 მილიონ ლარს, კაპიტალი კი 279.1 მილიონ ლარს შეადგენდა.