2022 წლის 30 სექტემბრის მდგომარეობით, სადაზღვევო სექტორისთვის ყველაზე ზარალიანი სამედიცინო და სახმელეთო სატრანსპორტო საშუალებათა დაზღვევაა.
საქართველოს სადაზღვევო სექტორის ანაზღაურებული ზარალების ოდენობამ სამედიცინო (ჯანმრთელობის) დაზღვევაში 194,256,312 ლარი შეადგინა. მიმდინარე წელს ანაზღაურებული სადაზღვევო ზარალის ოდენობით „ჯი პი აი“ 52,966,252 ლარით ლიდერობს. მეორეზეა „იმედი L“ 37,839,098 ლარით, ხოლო მესამეზე „არდი“ 27,860,618 ლარით.
სამედიცინო დაზღვევის სახეობაში მოზიდულმა პრემიამ 84,926,221 ლარი შეადგინა. ბაზრის ლიდერი ამ შემთხვევაშიც „ჯი პი აი ჰოლდინგია“ 23,935,253 ლარით, მეორე ადგილზეა „იმედი L“ 23,834,780 ლარით, ხოლო მესამეზე „საქართველოს სადაზღვევო ჯგუფი“ 12,136,003 ლარით. აღსანიშნავია, რომ საქართველოს მოსახლეობის 18 პროცენტი სარგებლობს კერძო სამედიცინო დაზღვევით, 2022 წლის 9 თვეში 672,934 სამედიცინო დაზღვევის პოლისი იყო მოქმედი.
სახმელეთო სატრანსპორტო საშუალებათა დაზღვევის (გარდა სარკინიგზო ტრანსპორტისა) სახეობაში მოზიდულმა პრემიამ კი 84,595,463 ლარი შეადგინა, ხოლო დამდგარმა ზარალმა 84,350,657 ლარი. ავტოდაზღვევის ბაზარზე დამდგარი ზარალის მიხედვით „თიბისი დაზღვევა“ ლიდერობს, მეორე ადგილზე კი „სადაზღვევო კომპანია ალდაგია“. აღსანიშნავია, რომ საქართველოში რეგისტრირებული ავტომობილების მხოლოდ 7%-ია დაზღვეული, მიმდინარე წლის 9 თვეში 110,639 პოლისი იყო მოქმედი.