2025 წლიდან საჯარო შესყიდვების სექტორში ახალი წესები ამოქმედდება. რას ითვალისწინებს ეს ცვლილება, რა იცვლება შემსყიდველი ორგანიზაციებისთვის და რა იცვლება ბიზნეს სუბიექტებისთვის, ამის შესახებ „კომერსანტის“ დილის ეთერში სახელმწიფო შესყიდვების სააგენტოს თავმჯდომარის მოადგილემ ზაზა ნანობაშვილმა ისაუბრა.
ნანობაშვილის თქმით, რეფორმა, რომელიც 2025 წელს უნდა ამოქმედდეს, არსებითად ცვლის პირობებს, როგორც შემსყიდველი ორგანიზაციებისთვის, ასევე ბიზნეს სუბიექტებისთვისაც.

რა იცვლება შემსყიდველი ორგანიზიცებისთვის.
„შემსყიდველი ორგანიზაციისთვის იცვლება ის, რომ 100 ათასი ლარამდე შესყიდვის შემთხვევაში შესაძლებელია, რომ არ შეიქმნას შესაბამისი კომისია და ანიჭებს უფლებამოსილებას, რომ შესყიდვები განახორციელოს სატენდერო კომისიების გარეშე. გადაწყვეტილებას იღებს დაწესებულების ხელმძღვანელი და კონკრეტული ერთი პირი, რომელიც იქნება წარმოდგენილი შემსყიდველი ორგანიზაციის ამა თუ იმ დანაყოფიდან.
მეორე, ასევე მნიშვნელოვანი თემა არის ის, რომ შემსყიდველი ორგანიზაციებისთვის სავალდებულო ხდება ბაზრის კვლევის განხორციელება. ახალმა კანონმა ნორმატიულ დონეზე დაგვავალა ბაზრის კვლევა და დაწყებულია ამ კვლებს რეგულაციებზე მუშაობა. ყველაფერი გაწერილი იქნება კანონქვემდებარე ნორმატიულ აქტში. შემსყიდველი ორგანიზაცია ამ პროცედურების გავლით განახორციელებს სათანადო მოკვლევას, რაც არის საწინდარი წარმატებული შესყიდვის.
მესამე - 2027 წლიდან სავალდებულო ხდება იმ საჯარო მოხელეების სერტიფიცირება, რომლებიც ამა თუ იმ სახელმწიფო ორგანიზაციაში შესყიდვების მიმართულებით არიან დასაქმებული. სერტიფიკატის გაცემას უზრუნველყოფს შესყიდვების სააგენტო,“ - განაცხადა ზაზა ნანობაშვილმა. მისი თქმით, სერტიფიკატები დღის წესრიგში დადგა იმის გამო, რომ ბევრ შემთხვევაში წარუმატებელი ტენდერების მიზეზი არს შემსყიდველების დაბალი დონე, სერტიფიკატების გაცემა კი მათი დონის და პრესტიჟულობის გაზრდას ემსახურება.
რა იცვლება შავი სიის წარმოების პროცესში.
ჩვენი შავი სიის წარმოება მიესადაგება ევრო დირექტივას. თუ გვქონდა შავ სიაში რეგისტრაციის 1 წელი ეს ვადა იცვლება და ახლა გააჩნია კონკრეტულ სამართალდარღვევას, თუ სისხლისსამართლებრივი დანაშაულის ნიშნები იკვეთება შავ სიაში რეგისტრაცია მოხდება 3 წლით. კონკურენციის წესების დარღვევა, არაკეთილსინდისიერი ქმედება და ა.შ, ამ შემთხვევაში შავ სიაში მოხვდება 2 წლით.
რა იცვლება ბიზნესის მხრივ. აქაც ზაზა ნანობაშვილმა 3 მნიშვნელოვანი ცვლილება გამოყო.
„აქ შემოდის თვითგანწმენდის მექანიზმი. ანუ იმ პირს, რომელიც არის შავ სიაში დადგენილი რეგულაციებით, მაგრამ მან განახორციელა მთელი რიგი ორგანიზაციული, ტექნიკური, ფინანსური ქმედებები, თავისი კეთილი ნების საფუძველზე გამოასწორა ყველა ჩადენილი ცდომილება, მას უფლება ექნება მიმართოს შესაბამის ორგანოს, რომელიც იმსჯელებს და დადგენილი წესით მას ამოიღებს შავი სიიდან, ანუ შესაძლებელია ამ სიიდან ვადაზე ადრეც გამოვიდეს, რაც დიდი შვება იქნება ბიზნესისთვის.

მცირე და საშუალო ბიზნესის ხელშეწყობის მიზნით სავალდებულოდ შემოდის ლოტებად დაყოფა, რაც ნიშნავს იმას, რომ შემსყიდველი ორგანიზაცია ვალდებულია კონკრეტული შესყიდვა შესაბამის ლოტებად დაყოს, რაც შანს უჩენს მცირე და საშუალო ბიზნესს მონაწილეობა მიიღონ ისეთ შესყიდვებში, რისი შესაძლებლობაც აქამდე შესყიდვის დიდი მოცულობის გამო არ ეძლეოდათ.

კიდევ ერთი სიახლე ბიზნესისთვის არის ის, რომ ე.წ საინფორმაციო შესყიდვების სისტემის საფუძველზე მათ ექნებათ შესაძლებლობა საქმის კურსში იყვნენ და წინდაწინ მიიღონ ინფორმაცია ყველა იმ დაგეგმილი შესყიდვის შესახებ. ეს საშუალებას მისცემს ბიზნესს უკეთესად მოემზადონ ტენდერებისათვის,“ - აღნიშნა ზაზა ნანობაშვილმა.