სატრანზიტო გზებზე პიკური დატვირთვის მართვისას უპირატესობა მალფუჭებადი პროდუქტს ენიჭება. ტრანსპორტის ინტენსიური მოძრაობა წლის ნებისმიერ პერიოდში შეიძლება წარმოიქმნას. ამჟამად საქართველოდან ხილის ექსპორტი აქტიურად მიმდინარეობს, რის გამოც, გზებზე საკმაოდ დიდი ალბათობით, ინტენსიური მოძრაობაა. როგორც გარემოს დაცვისა და სოფლის მეურნეობის მინისტრის პირველი მოადგილე გელა ხანიშვილი ,,კომერსანტთან“ ამბობს, ბოლო რამდენიმე წელია, ინფორმაციის გაცვლის ახალი სისტემა მუშაობს და ექსპორტიორებს მათი ტვირთების უსაფრთხო ტრანსპორტირებისთვის მაქსიმალური მხარდაჭერა აქვთ.
მიიღე ინფორმაცია უფრო სწრაფად „კომერსანტის“ Telegram-ზე.
,,მალფუჭებადი ტვირთების გადაზიდვისას მანქანებს ენიჭება სპეციალური კოდი, ინფორმაციულ აღრიცხვაში ექცევა და გზებზე მათი მოძრაბისას პატრული უპირატესობას სწორედ ასეთ ტვირთებს ანიჭებს. მაქსიმალურად ვცდილობთ რისკების შემცირებას, რის საშუალებასაც მოგვცემს სატრანსპორტო დერეფანი ამა თუ იმ მომენტისთვი. ამ ეტაპზე უკვე გადის კარტოფილი, მოცვის ექსპორტიც იწყება, მალე ატამი და ვაშლატამა დაემატება. ვცდილობთ, რაც შეიძლება სწრაფად გაიარონ ამ ტვირთებმა დერეფანში. იგივეა, როცა ჩვენ ვაწყობთ ,,ერთი ფანჯრის“ პრინციპს, რომ ექსპორტიორმა ერთ ადგილზე მიიღოს საბაჟო თუ სურსათის ეროვნული სააგენტოს ყველა მომსახურება. ამ მხრივ ექსპორტიორებს მაქსიმალური ხელშეწყობი პირობები ჰქონდათ შარშან და მალფუჭებადი პროდუქციისთვის მიდგომა არც წელს შეიცვლება“, - აცხადებს გელა ხანიშვილი ,,კომერსანტთან“.
მცხეთა–სტეფანწმინდა-ლარსის მარშრუტი, რომელიც საქართველოს რუსეთთან აკავშირებს, ექსპორტისთვის ,,ცხელ წერტილად“ ითვლება. აქ პიკური პერიოდები ხშირად უამინდობას, ან სეზონური პროდუქციის ექსპორტის მოცულობის მკვეთრ ზრდას უკავშირდება. პრიორიტეტული ტვირთების განსაზღვრას და მათი დროული გადაადგილების უზრუნველყოფას ახდენს საპატრულო პოლიცია, რომელიც საგზაო მოძრაობას არეგულირებს. დღეისათვის საექსპორტო პროდუქტების პრიორიტეტულობა მხოლოდ ქვეყნის შიდა საბაჟო ტერიტორიაზე მოქმედებს.
მარი ჩიტაია