„საქართველოში ბოლო რამდენიმე წლის განმავლობაში სურსათზე ორნიშნა ინფლაცია ფიქსირდებოდა, რაც საზოგადოებისთვის ერთ-ერთ დიდ პრობლემას წარმოადგენს და ამ მიმართულებით მუშაობაა საჭირო, თუმცა კიდევ  უფრო მნიშვნელოვანია, რომ ეს მოვახერხოთ ისეთი ინსტრუმენტების მეშვებით, რაც  საბაზრო ეკონომიკის პრინციპებთან თანხვედრაშია და გრძელვადიან პერიოდში ჩვენ ეკონომიკას არ დააზიანებს“ - ამის შესახებ, რადიო „კომერსანტის“ გადაცემაში, „კომერსანტის დილა“ ISET - ის კვლევითი ინსტიტუტის წამყვანმა ეკონომისტმა, სალომე გელაშვილმა ისაუბრა. მის თქმით, რაზეც თებერვალში მთავრობის  წარმომადგენლებმა ისაუბრეს იყო ის, რომ ახალი კანონპროექტი დაეფუძნება ევროკავშირის დირექტივას სამართლიანი კონკურენციის შესახებ. თუმცა სალომე გელაშვილი განმარტავს, რომ  ევროკავშირის ეს დირექტივა ფასებს და სხვა ტექნიკურ საკითხებს არ არეგულირებს.

„დირექტივის მიზანია, რომ სურსათის მიწოდების ჯაჭვის სხვადასხვა მონაწილეებს შორის ძალაუფლება მაქსიმალურად იყოს დაბალანსებული. არ უნდა შეიქმნას ისეთი სიტუაცია, რომ მსხვილ საცალო მოვაჭრეებს, სუპერმარკეტებს და ქსელებს ჰქონდეთ უფრო მეტი ძალაუფლება ვიდრე პროდუქციის მწარმოებლებს და მიმწოდებლებს, ამ საკითხების დარეგულირება შესაძლოა რომ საქართველოშიც იყოს საჭირო.

ეს დირექტივა ევროკავშირში 2022 წელს შევიდა ძალაში და რთულია იმის თქმა, თუ რა ზეგავლენა აქვს ამ დირექტივას და რამდენად იქნება მისი საქართველოში გადმოტანა ეფექტური. მთავრობის განცხადებიდან იკვეთებოდა ის, რომ გარკვეული ზემოქმედებაა კერძო სექტორზე, მოხდა კერძო სექტორთან გასაუბრება იმასთან დაკავშირებით, რომ ფასები შემცირებულიყო, ჩვენ ეს მეთოდი მართებულად არ მიგვაჩნია, რადგან ეს კერძო სექტორზე ზეწოლაა და აქტიური სიგნალია, როგორც ადგილობრივი მწარმოებლისთვის, ასევე უცხოელი ინვესტორებისთვის. იმისთვის, რომ მოკლევადიან პერიოდში მაღალი ფასების წნეხი აღმოვფხვრათ, ვფიქრობთ  რომ სოცდაუცველი მოსახლეობისთვის შესაძლოა გაკეთდეს ინდექსირება. რაც  შეეხება უფრო ჯანსაღ  გზებს ფასების შემცირებისა, ეს გზები  უკავშირდება იმას, რომ გავზარდოთ ჩვენი წარმოება, სასოფლო -სამეურნეო პროდუქციის შენახვის და  ტრანსპორტირების პირობები,  ასევე ძალიან მნიშვნელოვანია, რომ შევამციროთ სურსათის ნარჩენები და ის საკვები, რომლებიც  ვარგისია და უსაფრთხოა მოხმარებისთვის, მაქსიმალურად მოვიხმაროთ. დღეს ფაქტობრივად არ არის ცნობილი თუ რა ფასნამატები და რა მარჟები გვაქვს სურსათის მიწოდების ჯაჭვში, შესაბამისად იმაზე საუბარი, რომ მაღალ ფასში რომელიმე კონკრეტული რგოლია დამნაშავე, საფუძველს მოკლებულია.“ - აღნიშნა სალომე გელაშვილმა.

გელაშვილს თქმით საერთაშორისო გამოცდილება აჩვენებს იმას, რომ ფასების კონტროლს  უარყოფით გავლენა აქვს და შედეგად  წარმოიქმნება დეფიციტი, მცირდება  ხარისხი, იზრდება კორუფციის რისკი და რესურსების გადანაწილება ხდება არასწორად.

„როდესაც ჩვენ ვარეგულირებთ გარკვეული პროდუქტების ფასს საბოლოო ჯამში ამან  შეიძლება ზოგ პროდუქტზე არა ფასის შემცირება, არამედ  პირიქით გაზრდაც გამოიწვიოს,  ასევე როდესაც ვარეგულირებთ ერთ რომელიმე  ბაზარს იქიდან  გამომდინარე რომ  ყველა  ბაზარი ერთმანეთთან არის დაკავშირებული, ამან შეიძლება სხვა ბაზრებზე საბაზრო  წონასწორობის დარღვევა გამოიწვიოს, რაც არაჯანსაღი მიდგომაა“- აღნიშნა სალომე გელაშვილმა.

 თაკო კვაჭანტირაძე