„ანტიკორუფციული მოძრაობა“ საავტომობილო გადაზიდვების ნებართვების გაძვირებასთან დაკავშირებით საქართველოს პარლამენტს მიმართავს, რომ ეკონომიკის მინისტრის და სახმელეთო ტრანსპორტის სააგენტოს ხელმძღვანელის პარლამენტში დაბარება და რეგულაციის ძალაში შესვლის შეჩერება მოხდეს, - ამის შესახებ „ანტიკორუფციული მოძრაობის“ აღმასრულებელმა დირექტორმა, ლაშა ფარულავამ განაცხადა.

ანტიკორუფციული მოძრაობის ინფორმაციით, საქართველოს ეკონომიკის სამინისტრო, სახმელეთო ტრანსპორტის სააგენტო 1-ლი მაისიდან, საერთაშორისო საავტომობილო გადაზიდვებში ახალ რეგულაციებს აწესებს და გადაზიდვების ნებართვებს აძვირებს.

ახალი რეგულაციით, ერთჯერადი ნებართვის ღირებულება 70 ლარის ნაცვლად, 140 ლარი გახდა, დაჩქარებული ტიპის ნებართვა კი 100 ლარის ნაცვლად 200 ლარი ეღირება.

„საკითხი ათასობით საქართველოს მოქალაქეს, თვითდასაქმებულს, საერთაშორისო გადამზიდავს ეხება. ამ რეგულაციის შეჩერება უნდა მოხდეს. ჩვენ, რა თქმა უნდა, გადამზიდავების ადვოკატირების კამპანიას გავაგრძელებთ და იქნება პროტესტიც, თუმცა მნიშვნელოვანია რომ ხელისუფლებამ ყველა ღონე იხმაროს იმისთვის, რომ გადამზიდავებს მდგომარეობა შეუმსუბუქდეს“, - განაცხადა ლაშა ფარულავამ.

ანტიკორუფციული მოძრაობის თავმჯდომარის, ვასო ურუშაძის განცხადებით, საავტომობილო გადაზიდვების ნებართვების გაძვირებასთან დაკავშირებით მიღებული გადაწყვეტილებით კორუფციული რისკფაქტორები ჩნდება.

მისივე თქმით, ტრანსპორტირების ხარჯების ასეთი ზრდა საბოლოო ჯამში, პროდუქციის სარეალიზაციო ღირებულებაზეც აისახება.

„ეს ერთმნიშვნელოვნად აისახება ტრანსპორტირების მომსახურების გაძვირებაზე, რაც თავისთავად სხვადასხვა პროდუქციის გაძვირებას გულისხმობს. ნებისმიერი პროდუქტის გაძვირებას გულისხმობს იქნება ეს სასურსათო პროდუქტი, სამშენებლო მასალა თუ სხვა, მის ფასწარმოქმნაში ტრანსპორტირების ხარჯებს და ტრანსპორტირების ღირებულებას მნიშვნელოვანი გავლენა აქვს. ამ შემთხვევაში ჩვენ გვექნება ჯაჭვური რეაქცია, რომელიც ისედაც მძიმე სოციალურ და ეკონომიკურ მდგომარეობას ქვეყანაში კიდევ უფრო გააუარესებს. რა თქმა უნდა, კორუფციული რისკფაქტორებიც ჩნდება და გარკვეული კითხვები გვაქვს, თუ ვინ არის ამ რეგულაციის ე.წ. ლობისტი და ხომ არ არის ეს მსხვილი კომპანიები, რომლებიც დაახლოებულები არიან სახელისუფლებო შტოებთან, თუმცა „ანტიკორუფციული მოძრაობა“ ამ მიმართულებით კვლევას აღრმავებს და ჩვენ უახლოეს მომავალში, კონკრეტული შედეგები და მიგნებები წარმოდგენილი გვექნება,“ - განაცხადა ვასო ურუშაძემ.

„ანტიკორუფციული მოძრაობის“ ინფორმაციით, 1-ლი მაისიდან, ახალი რეგულაციები მრავალჯერადი ნებართვების გაცემის წესსაც შეეხება.