„საქართველოს ეროვნული ბანკის კანონში ცვლილების შეტანის მიზნით გადადგმული ბოლოდროინდელი ნაბიჯები, რომელიც ცვლის საქართველოს ეროვნული ბანკის მართვის სტრუქტურას, თავდაუზოგავი შრომით მოპოვებული სანდოობის დაკარგვის რისკს ქმნის,”- ნათქვამია საერთაშორისო სავალუტო ფონდის მისიის ხელმძღვანელის, ჯეიმს ჯონის განცხადებაში.
„კომერსანტთან“ საუბრისას ეკონომისტმა სოსო ბერიკაშვილმა განაცხადა, რომ საერთაშორისო სავალუტო ფონდის მისიის ხელმძღვანელის ეს შეფასება თავისთავად საგანგაშოა იმიტომ, რომ ამან შეიძლება მომავალში ეროვნულ ბანკს მსგავს ინსტიტუტებთან ურთიერთობაში პრობლემები შეუქმნას.
„საერთაშორისო სავალუტო ფონდის მისიის ხელმძღვანელის შეფასება თავისთავად საგანგაშოა. ეროვნული ბანკი უნდა იყოს და მანამდე მეტ-ნაკლებად იყო სამართლებრივად დამოუკიდებელი ინსტიტუტი და შესაბამისად, საერთაშორისო სავალუტო ფონდს და საერთაშორისო ფინანსურ ინსტიტუტებს მასთან ყოველთვის კარგი დამოკიდებულება ჰქონდათ. ამ დამოკიდებულების შერყევამ, როცა ასეთი მაღალი რანგის ორგანიზაციისგან ასეთ შეფასებებს ვხედავთ, შეიძლება პრობლემა შეუქმნას ეროვნულ ბანკს მსგავს ინსტიტუტებთან ურთიერთობაში. ასეთ ინსტიტუტებთან ურთიერთობა კი ძალიან მნიშვნელოვანია ჩვენი ქვეყნისთვისაც და ეროვნული ბანკისთვისაც“, - აცხადებს სოსო ბერიკაშვილი.
შეგახსენებთ, რომ პარლამენტმა 83 ხმით, რვის წინააღმდეგ, მესამე მოსმენით, დაჩქარებული წესით მიიღო ეროვნული ბანკის შესახებ კანონში შესატანი ცვლილება.
ცვლილების თანახმად, ეროვნული ბანკის ვიცე-პრეზიდენტს ეროვნული ბანკის საბჭოს წევრთაგან ეროვნული ბანკის საბჭოს წარდგინებით თანამდებობაზე ნიშნავს და თანამდებობიდან ათავისუფლებს საქართველოს პრეზიდენტი.
ეროვნული ბანკის ვიცე-პრეზიდენტებს ეროვნული ბანკის პრეზიდენტის წარდგინებით, ხოლო იმ შემთხვევაში თუ ეროვნული ბანკის პრეზიდენტი გათავისუფლებულია თანამდებობიდან – ეროვნული ბანკის საბჭოს არანაკლებ ორი წევრის წარდგინებით, თანამდებობაზე ნიშნავს და თანამდებობიდან ათავისუფლებს ეროვნული ბანკის საბჭო.
ეროვნული ბანკის პრეზიდენტის არყოფნის შემთხვევაში მის მოვალეობას ასრულებს პირველი ვიცე-პრეზიდენტი, ხოლო მის მიერ უფლებამოსილების განხორციელების შეუძლებლობის შემთხვევაში ეროვნული ბანკის პრეზიდენტის მოვალეობის შესრულებას ეროვნული ბანკის საბჭო ერთ-ერთ ვიცე-პრეზიდენტს ავალებს.
კანონის ამოქმედებიდან საქართველოს ეროვნული ბანკის ერთ-ერთი მოქმედი ვიცე-პრეზიდენტის (გარდა პირველი ვიცე-პრეზიდენტისა) უფლებამოსილების შეწყვეტამდე ეროვნული ბანკის საბჭოს შემადგენლობაში შედიან: ეროვნული ბანკის პრეზიდენტი, პირველი ვიცე-პრეზიდენტი, სამი ვიცე-პრეზიდენტის და სხვა წევრები.
კანონპროექტის ინიციატორები არიან საქართველოს პარლამენტის წევრები: პაატა კვიჟინაძე, ირაკლი ზარქუა, გოგი მეშველიანი, რიმა ბერაძე და ანტონ ობოლაშვილი.