„ვფიქრობ, ჩვენ მხარი უნდა დავუჭიროთ ბიუჯეტის ცვლილებების პროექტს, გვაქვს გარკვეული შენიშვნები, რომელიც აისახება დასკვნაში და გადაეგზავნება პარლამენტის თავმჯდომარეს და შემდგომ მთავრობას“, - ამის შესახებ საფინანსო-საბიუჯეტო კომიტეტის თავმჯდომარემ ირაკლი კოვზანაძემ კომიტეტის სხდომაზე განაცხადა, სადაც საქართველოს 2021 წლის სახელმწიფო ბიუჯეტის კორექტირებული ვერსია განიხილეს. ინფორმაციას პარლამენტის პრესსამსახური ავრცელებს.
2021 წლის ბიუჯეტში ცვლილებების პროექტი, კომიტეტებსა და ფრაქციებში განხილვის შემდგომ, საფინანსო-საბიუჯეტო კომიტეტმა შემაჯამებელ სხდომაზე განიხილა.
ინფორმაცია საბიუჯეტო ცვლილებების შესახებ გაერთიანებული კომიტეტის წევრებს ფინანსთა მინისტრის პირველმა მოადგილემ გიორგი კაკაურიძემ გააცნო და იმ პროგნოზებზე და მაჩვენებლებზე მიაწოდა ინფორმაცია, რამაც საბიუჯეტო ცვლილებების აუცილებლობა გამოიწვია.
2021 წლის სახელმწიფო ბიუჯეტის ცვლილებებით, ბიუჯეტის შემოსულობები - 1 175 მლნ ლარით, ხოლო გადასახდელები 1 114.3 მლნ ლარით იზრდება.
ბიუჯეტი, რომელიც დაგეგმილი იყო 4,3 %-იან ეკონომიკურ ზრდაზე, წარმოდგენილი პროექტის მიხედვით, 7,7 პროცენტია.
მაისში ეკონომიკური ზრდის მაჩვენებელმა 25,5 პროცენტი შეადგინა, ხოლო მიმდინარე წლის 5 თვეში კუმულატიური ზრდა 11,5 პროცენტია.
მთლიანი შიდა პროდუქტის ზრდა არის 3,4 პროცენტი და 7,7 პროცენტს აღწევს. ბიუჯეტის დეფიციტი 7,6 პროცენტიდან 6,9 პროცენტამდე, სამთავრობო ვალი კი 5, 4 პროცენტით, 54, 6 პროცენტამდე მცირდება.
ბიუჯეტის შემოსულობები 1 მილიარდ 175 მლნ ლარით, გადასახდელები კი 1მილიონ 114 ლარით იზრდება და ბიუჯეტის ასიგნებები თითქმის 19,5 მილიარდ ლარს აღწევს.
მომხსენებელმა განმარტა, რომ ბიუჯეტის პროექტზე მუშაობისას, სამი მნიშვნელოვანი მიმართულებით, ჯანდაცვის, ეკონომიკური და საბიუჯეტო დეფიციტის შემცირების კუთხით მოხდა თანხების გადანაწილება.
მათ შორის, მინისტრის მოადგილის ინფორმაციით, მთავარ ფინანსურ დოკუმენტში: COVID19-ის მართვის ნაწილში ჯანდაცვის ხარჯები 446,0 მლნ ლარით არის გაზრდილი.
„საქართველოს 2021 წლის სახელმწიფო ბიუჯეტის შესახებ საქართველოს კანონში ცვლილების თაობაზე“ საქართველოს კანონის პროექტთან დაკავშირებული დასკვნები კომიტეტს გენერალური აუდიტორის მოადგილემ, ეკა ღაზაძემ და საქართველოს ეროვნული ბანკის ვიცე-პრეზიდენტმა არჩილ მესტვირიშვილმა გააცნეს და შესაბამისი რეკომენდაციები წარადგინეს.
საფინანსო-საბიუჯეტო კომიტეტის შემაჯამებელ სხდომას, ასევე ესწრებოდნენ და მოსაზრებები გამოხატეს იმ უწყებების და სამინისტროების წარმომადგენლებმა, სადაც საბიუჯეტო ცვლილებები განხორციელდა.
მთავრობა, 2021 წლის ბიუჯეტის გადამუშავებულ ვერსიას დასკვნაში ასახული შენიშვნების გათვალისწინებით, პროცედურის თანახმად, პარლამენტს რამდენიმე დღეში დაუბრუნებს.
ბიუჯეტში ცვლილებები რიგგარეშე სხდომაზე დასამტკიცებლად 23 ივლისს გავა.