საფრანგეთის ფეხბურთის ფედერაციის პრეზიდენტი ნოელ ლე გრაე Le Parisien-თან ინტერვიუში აცხადებს, რომ რუსეთის ნაკრები უნდა ჩაიხსნას 2022 წლის მსოფლიო ჩემპიონატიდან, უკრაინაში მიმდინარე მოვლენების გამო.

„მე ჯერ არ განმიხილავს ეს საკითხი სხვა ფედერაციების ხელმძღვანელებთან. მაგრამ მომხრე ვარ, გავრიცხოთ რუსეთი 2022 წლის მსოფლიო ჩემპიონატიდან. ეს ჩემი აზრია. ყოველთვის ვთვლიდი, რომ სპორტი შერიგებისა და დაძაბულობის მოხსნას უნდა ემსახურებოდეს. მაგრამ ეს ძალიან შორს წავიდა და სპორტის სამყარო, კერძოდ ფეხბურთი განზე არ უნდა გადგეს. რა თქმა უნდა, რუსეთის გარიცხვის წინააღმდეგი არ ვიქნები“, – თქვა ლე გრაემ.

რუსეთის ნაკრები მსოფლიო ჩემპიონატის ფინალური ეტაპის საგზურისთვის კვლავაც იბრძვის და მას პოლონეთთან ჰქონდა გასამართი მატჩი, რომელიც 24 მარტს იყო დაგეგმილი მოსკოვში. მაგრამ პარასკევს უეფას აღმასრულებელმა კომიტეტმა რუსეთის ტერიტორიაზე საერთაშორისო მატჩების გამართვა აკრძალა.

sportrbc.ru