საფრანგეთის მთავრობის წამყვანმა სამეცნიერო მრჩეველმა, პროფესორმა ჟან-ფრანსუა დელფრესმა განაცხადა, რომ ე.წ. ინდური შტამის გავრცელების გამო, ქვეყანაში, სავარაუდოდ, ეპიდემიის მეოთხე ტალღა დადგება.

მისი თქმით, ვაქცინების გავრცელება ხელს შეუწყობს ვირუსის ამ ახალი ტალღის გავლენის შერბილებას, რომელიც, უამრავი სამედიცინო ექსპერტის აზრით, საფრანგეთში სექტემბერში ან ოქტომბერში შეიძლება დადგეს.

„მე ვფიქრობ, რომ მეოთხე ტალღა იქნება, მაგრამ ეს ბევრად უფრო ზომიერი იქნება, ვიდრე წინა სამი ტალღა, რადგან ვაქცინაციის დონე განსხვავებულია“, - აღნიშნა ჟან-ფრანსუა დელფრესმა.

29 ივნისს საფრანგეთის ჯანდაცვის მინისტრმა, ოლივიე ვერანმა განაცხადა, რომ ქვეყანაში კორონავირუსის ე.წ. ინდური შტამი ნელ-ნელა დომინანტური ხდება. ოლივიე ვერანის განმარტებით, ამჟამად საფრანგეთში ე.წ. ინდურ შტამზე შემთხვევების 20% მოდის.

„ვარიანტი „დელტა“ თანდათან დომინანტური ხდება, როგორც ეს მსოფლიოს ყველა ქვეყანაში ხდება, რადგან უფრო გადამდებია“, - აღნიშნა საფრანგეთის ჯანდაცვის მინისტრმა.

23 ივნისს დაავადებათა კონტროლის ევროპულ ცენტრში განაცხადეს, რომ აგვისტოს ბოლოს ე.წ. ინდური შტამი ევროკავშირში შემთხვევების 90%-ს შეადგენს.

11 მაისს ჯანდაცვის მსოფლიო ორგანიზაციის კორონავირუსთან ბრძოლის ტექნიკური ჯგუფის ხელმძღვანელმა, მარია ვან კერკხოვემ განაცხადა, რომ კორონავირუსის ვარიანტი, რომელიც პირველად გასულ წელს ინდოეთში გამოვლინდა, კლასიფიცირდება როგორც შემაშფოთებელი ვარიანტი.

imedinews.ge