საფრანგეთის პარლამენტის ქვედა პალატამ ინფლაციის შესამცირებლად 20 მლრდ ევროს პაკეტი, ასევე, ოჯახების დასახმარებლად საგადასახადო შეღავათები დაამტკიცა. ინფორმაციას Reuters ავრცელებს.
ქვედა პალატამ გასულ კვირას უკვე დაამტკიცა ინფლაციის წინააღმდეგ ბრძოლის ღონისძიებათა პაკეტი, რომელიც პენსიების ზრდას, ქირის ზრდაზე დროებით შეზღუდვასა და საჯარო სექტორში დასაქმებულთა ხელფასების მატებას ითვალისწინებს. ამასთან, დამატებითი საბიუჯეტო კანონპროექტი გაზრდილი ხარჯებისა და საგადასახადო შეღავათების დაფინანსებას იმ საგადასახადო შემოსავლებით გუსლიხმობს, რომლებმაც წლის დასაწყისიდან მოლოდინს გადააჭარბა.
კანონპროექტი სახელმწიფო სექტორის ბიუჯეტის დეფიციტს მშპ-ის 5%-ის ოდენობით ითვალისწინებს, რაც წინა წელთან შედარებით უცვლელია, ასევე, საავტომობილო საწვავზე სამთავრობო ფასდაკლებას ლიტრაზე 30 ევროცენტის ოდენობით გულისხმობს. ამასთან, კანონპროექტი ტელევიზიებზე წლიურ გადასახადს აუქმებს.
კანონმდებლებმა მხარი არ დაუჭირეს ცვლილებას, რომელიც ნავთობისა და სატანკერო მსხვილ კომპანიებზე „სუპერგადასახადის“ შემოღებას იმიტომ ითვალისწინებდა, რომ ისინი ენერგომატარებლებზე მაღალი ფასებითა და გადაზიდვის გაძვირებული ტარიფებით სარგებელს იღებენ.
ივლისში ევროპის ცენტრალურმა ბანკმა გამოაცხადა, რომ ინფლაციის წინააღმდეგ საბრძოლველად ევროზონაში სამ ძირითად საპროცენტო განაკვეთს 0,50 პროცენტული პუნქტით გაზრდის, რაც 2011 წლის შემდეგ პირველად მოხდა. ბანკმა გადაწყვეტილება იმ ფონზე მიიღო, როცა 2002 წლის შემდეგ ევროს კურსი დოლარზე ქვემოთ პირველად დაეცა, ხოლო ინფლაციამ ივნისში რეკორდულ მაჩვენებელს, 8,6%-ს მიაღწია.
საფრანგეთის ქვედა პალატის მიერ 2022 წლის დამატებითი საბიუჯეტო კანონპროექტის დამტკიცების შემდეგ, ის სენატს გადაეგზავნა, სადაც უმრავლესობაში კონსერვატიული პარტია, „რესპუბლიკელები“ არიან. სენატის შემდეგ კანონპროექტი საბოლოო დასამტკიცებლად ისევ ქვედა პალატას დაუბრუნდება.
ინფლაცია
