საფრანგეთმა, კანადამ და აშშ-მა მოქალაქეებს მოუწოდეს, რომ სასწრაფოდ დატოვონ რუსეთი და ბელარუსია. დასავლეთის ქვეყნების საგარეო საქმეთა სამინისტროები თვლიან, რომ რუსეთისა და ბელარუსის ტერიტორიაზე ყოფნისას შეიძლება დაკავებისა და იძულებითი მობილიზაციის საფრთხის წინაშე აღმოჩნდეს. ინფორმაციას უკრაინული მედია ავრცელებს.
საფრანგეთის საგარეო საქმეთა სამინისტრომ მოუწოდა თავის მოქალაქეებს დაუყოვნებლივ დატოვონ ბელარუსის ტერიტორია უკრაინის წინააღმდეგ რუსეთის ფედერაციის ომის გამო. შესაბამისი შეტყობინება ფრანგმა დიპლომატებმა სააგენტოს ვებგვერდზე ორშაბათს, 13 თებერვალს გამოაქვეყნეს.
„უკრაინის წინააღმდეგ რუსეთის შეიარაღებული თავდასხმის და ბელარუსის საჰაერო სივრცის დახურვის კონტექსტში, ბელარუსში ნებისმიერი მოგზაურობა ოფიციალურად მიუღებელია“, - ნათქვამია საფრანგეთის საგარეო საქმეთა სამინისტროს განცხადებაში.
ოფიციალურმა პარიზმა მოუწოდა თავის მოქალაქეებს ბელარუსია ლიტვის, პოლონეთის ან ლატვიის საზღვრის გავლით დატოვონ.
კანადაც ბელარუსიის დატოვებისკენ მოუწოდებს თავის მოქალაქეებს. მსგავსი მიმართვა კანადის საგარეო საქმეთა სამინისტრომ გაავრცელა.
„მოერიდეთ ბელარუსიაში ყოველგვარ მოგზაურობას ადგილობრივი კანონების თვითნებური გამოყენებისა და რუსეთსა და უკრაინას შორის შეიარაღებული კონფლიქტის საფრთხის გამო“, - ნათქვამია განცხადებაში.
რუსეთის დატოვებისკენ მოქალაქეებს აშშ-ც მოუწოდებს. აშშ-ის სახელმწიფო დეპარტამენტმა ამერიკელების ყურადღება გაამახვილა იმაზე, რომ რუსეთის ფედერაციაში შესვლა უსაფრთხო არ არის უკრაინაში რუსული ჯარების სრულმასშტაბიანი შეჭრის, რუსეთის სახელმწიფო სამსახურების მიერ დაკავების რისკის, მობილიზაციის გამო.
„გამოიყენეთ დამატებითი სიფრთხილე არასწორი დაკავების რისკის გამო,“ - ნათქვამია აშშ-ს საგარეო საქმეთა სამინისტროს განცხადებაში.