ერდოღანი მიწისძვრის გამო საყოველთაო არჩევნებს არ აუქმებს
თურქეთის სამხრეთ-აღმოსავლეთ ნაწილში მომხდარი მიწისძვრის დამანგრეველი შედეგების მიუხედავად, თურქეთის პრეზიდენტი რეჯეფ თაიფ ერდოღანი არჩევნებს სამ თვეში გამართავს.
Bloomberg-ის ცნობით, 20-წლის ხელისუფლებაში ყოფნის პერიოდში, ერდოღანს ერთ-ერთი უმძიმესი საარჩევნო რბოლა აქვს წინ. გამოცემა წერს, რომ გუშინ მან 90-დღიანი საგანგებო მდგომარეობა გამოაცხადა, რაც მას საშუალებას აძლევს, რომ სტიქიით დაზარალებულ რაიონებთან დაკავშირებით სწრაფი და ქმედითი გადაწყვეტილებები მიიღოს.
როგორც გამოცემა თავის წყაროებზე დაყრდნობით წერს, საგანგებო მდგომარეობის დასრულების შემდეგ, ერდოღანი არჩევნებს 14 მაისს გამართავს. წყაროს თქმით, საგანგებო მდგომარეობა შეიძლება 90 დღეზე ადრე დასრულდეს.
დღეს ერდოღანი სტიქიის შედეგად დაზარალებულ რაიონებს კაჰრამანმარაშისა და ჰატაის სტუმრობს. გამოცემა აღნიშნავს, რომ მიწისძვრის შედეგად დაზარალებულ რაიონებში არის მოსახლეობა, რომელიც ხმას მის პარტიას აძლევს და მნიშვნელოვან როლს ასრულებს მის წინასაარჩევნო კამპანიაში. არჩევნების წინ, ერდოღანის მთავარი გამოწვევა მიწისძვრის შედეგად დაზარალებული 13,4 მილიონი ადამიანის დახმარებაა.
Bloomberg Economics-ის თანახმად, კატაკლიზმების შემდგომმა დანახარჯებმა, ორი წლის განმავლობაში, შეიძლება მშპ-ს 5,5%-ს მიაღწიოს.
გარდა ამისა, Anadolu-ს ცნობით, კაჰრამანმარაშში ერდოღანმა თქვა, რომ თითოეული დაზარალებული ოჯახი სახელმწიფოსგან 10 000 ლირის დახმარებას მიიღებს. მან ასევე განაცხადა, რომ სტიქიის ზონის მაცხოვრებლები, სურვილის შემთხვევაში, ანტალიის, ალანიისა და მერსინის სასტუმროებში განთავსდებიან.
ერდოღანის თქმით, მთავრობა მიზნად ისახავს, რომ მიწისძვრით დაზარალებული 10 პროვინციის მაცხოვრებლები ერთი წლის განმავლობაში ახალი ბინებით უზრუნველყოს.