სამების საკათედრო ტაძარში კი, საგანგებო მდგომარეობის მიუხედავად, საღამოს ლოცვისთვის ემზადებიან. აკრძალვის მიუხედავად, იკრიბება მრევლიც. ხუთ საათზე სამების ტაძარში დაიწყო საღამოს ლოცვა.
„რაც განაცხადა სინოდმა, გაგრძელდება ჩვეულებრივად წირვა-ლოცვა. ხალხს რაც შეეხება - ვისაც სურვილი ექნება, მოვა. დანარჩენთან დაკავშირებით საპატრიარქო გააკეთებს განცხადებას, რადგან გუშინ არ იყო გამოცხადებული საგანგებო მდგომარეობა", - აცხადებენ სამების ტაძარში.
სასულიერო პირები აცხადებენ, რომ საპატრიარქოსგან ახალი მითითება არ აქვთ და ჩვეულ რეჟიმში გრძელდება მსახურება. ხვალ დილის ათი საათიდან დაიწყება წირვა.
„დღეს ხუთზე აღესრულება სადღესასწაულო ლოცვა - ხვალ ათის ნახევარზე დაიწყება წირვა, მისი უწმინდესობა აღასრულებს მას. ხვალ არის ჯვრის თაყვანისცემის დღესასწაული", - ამბობენ სამების საკათედრო ტაძარში.
სამებაში მოსული მლოცველები კი ამბობენ, რომ ამ განსაცდელიდან ერთადერთი ხსნა ლოცვაა და ამიტომ, ტაძრებში წირვა-ლოცვა არ უნდა შეწყდეს.
„ეკლესია დაარსებულია მაცხოვრის მიერ - არ შეიძლება ეკლესიის გაჩერება. ეკლესიაში წირვა-ლოცვა არასდროს შეწყვეტილა. ერთადერთი გზა, რომ აქედან გამოვიდეს კაცობრიობა, არის ლოცვა", - ამბობენ მორწმუნეები.
შეგახსენებთ, რომ ქვეყანაში დღეიდან საგანგებო მდგომარეობა ცხადდება.
ფორმულა
სამება
