საქართველოს რეგიონებში საგაზაფხულო სამუშაოების სეზონი იწყება, მაგრამ დიზელის გაძვირების გამო ხალხი მიწის დამუშავებას ვერ ახერხებს. თუკი შარშან პანდემიის შიშით მიწების დიდი ნაწილი დამუშავდა, წელს გლეხებს საკარმიდამო ნაკვეთების დამუშავების შესაძლებლობაც არ აქვთ.

მიიღე ინფორმაცია უფრო სწრაფად ჩვენს Telegram-ზე.

ასეთ ვითარებაში გურიაში, ოზურგეთის მუნიციპალიტეტის სოფელ შრომას მკვიდრი დავით ბოლქვაძე გამოსავალს ვაუჩერიზაციის პროცესის დაწყებაში ხედავს. მინიმუმ კი, შეღავათიან სესხებზე ხელმისაწვდომობას ითხოვს, რომ ხალხმა სიმინდიც დათესოს და ციტრუსისა და თხილის მოვლაც შეძლოს.

გურული გლეხის ინფორმაციით,  3000  კვ/მ მიწის დამუშავებას შარშან, სულ მცირე,  500 ლარი დასჭირდა,  წელს ხარჯი 1000 ლარს გადააჭარბებს.

,,ძალიან მძიმე სიტუაციაა სოფლებში, ხალხს ელემენტარული საშუალება არ აქვს, რომ მიწა დაამუშაოს. დიზელი კატასტროფულად არის გაძვირებული, ასევე სასოფლო კულტურების მოვლის საშუალებები და სასუქი, რასაც ხალხი რეალურად ვერ გასწვდება.  მით უმეტეს, ახლა ციტრუსში შესატანია სასუქი, რომლის ფასმა 80 ლარს მიაღწია. შარშან ამ დროს 38 ლარი ღირდა. თხილსაც მოვლა უნდა, ჩაიზე არაფერს ვამბობ, 95%  განადგურებულია. რა სიტუაციასაც ვხედავთ, გლეხების  90% ვერ მოხნავს მიწას და ვერ დათესავს სიმინდს, ვერც ბოსტნეულს.  ხარჯი ორმაგდება, როგორც არასდროს, გაჩნდა ვაუჩერის აუცილებლობა, სულ მცირე, შეღავათიანი სესხები მაინც მოგვცენ, რომ  საგაზაფხულო სამუშაოებს მოვახმაროთ.  შარშან პანდემიის შიშით მიწების დიდი ნაწილი დამუშავდა,  წელს კი მოსახლეობის 90%  სამუშაოებს ვერ ჩაატარებს, არც ერთ შემთხვევაში ხალხს  ამის საშუალება არ აქვს“, - ამბობს დავით ბოლქვაძე ,,კომერსანტთან“.

მისი თქმით, დიდი ალბათობაა, რომ საგაზაფხულო სამუშაოების დაწყება გაჭიანურდეს. განსაკუთრებით კი სიმინდს ექმნება საფრთხე.

,,მაისში სიმინდი დათესილი უნდა იყოს, რომ დამტვერვა მოასწროს, მერე აზრს კარგავს. დროზე უნდა სოფელს შველა, ვაუჩერის გაცემა თუ დაგვიანდება. ისედაც უჭირდა ხალხს და ახლა განსაკუთრებით,  თუკი კითხავთ, თითქმის ყველა  მოსახლე გეტყვით, რომ მიწას ვერ დაამუშავებს.  დროზეა ზომები მისაღები, რომ ხალხი მშიერი არ დარჩეს“, - ამბობს გურული გლეხი.

ნავთოპროდუქტების იმპორტიორთა კავშირის  ინფორმაციით, რუსეთ–უკრაინის ომის დაწყებიდან დღემდე დიზელი დაახლოებით 90 თეთრით გაძვირდა და 4,25 ლარს მიაღწია.  

გარდა ამისა, ფასები მატულობს შხამ-ქიმიკატებზე, განსაკუთრებით კი სასუქი გაძვირდა.

მარი ჩიტაია