2023 წლის იანვარ-თებერვალში 2022 წლის ანალოგიურ პერიოდთან შედარებით საქართველოში საჰაერო სატვირთო გადაზიდვების ბაზარი 19,52%-ით შემცირდა.
„კომერსანტი“ დაინტერესდა, თუ რას უკავშირდება საჰაერო სატვირთო გადაზიდვების შემცირება. როგორც კომპანია „სქაი ლოჯისთიქსში“ განაცხადეს, საქართველოში საჰაერო სატვირთო გადაზიდვების კლება ძირითადად ჩინეთიდან ტვირთნაკადის შემცირებას უკავშირდება.
„საჰაერო სატვირთო გადაზიდვების მოცულობის კლება პირველ რიგში უკავშირდება მსოფლიოში არსებულ ვითარებას. ბოლო პერიოდში მთელს მსოფლიოში საჰაერო სატვირთო გადაზიდვების კუთხით კრიზისი შეინიშნება. თუმცა ამ შემთხვევაში საქართველოს თავისი მიზეზები აქვს და მთელს მსოფლიოს თავისი. საქართველოში კლება ძირითადად ჩინეთიდან გადაზიდვების შემცირების ხარჯზეა. ეს დამოკიდებულია ომზე, გადარიცხვებზე, ზოგადად კრიზისია - პოსტკოვიდური კრიზისი ისევ გრძელდება. პლუს ამას ემატება სეზონურობა, იანვარში ჩინეთში 2 კვირა დასვენების დღეები იყო, რუსეთ-უკრაინის გამო დაწესებული სანქციები და ეს ყველაფერი ჩინეთიდან გადაზიდვებზე პოვებს ასახვას. ასევე პრობლემას ქმნის ჩინეთში გადარიცხვები, რაც ახალი შეკვეთების გაკეთების პრობლემებსაც ქმნის.
ევროპა და ამერიკა ისევ ისე მუშაობს, არ შემცირებულა ამ ქვეყნებიდან გადაზიდვებზე მოთხოვნა და კლება შეეხება ძირითადად ჩინეთს.
აღსანიშნავია ის ფაქტიც, რომ ჩინეთიდან გადაზიდვების დიდი ნაწილი მოდიოდა საფოსტო გადაზიდვებზე, თუმცა ბოლო პერიოდში სახეზეა თურქულ ონლაინ საიტებიდან მოთხოვნილების ზრდა, რადგანაც თურქეთიდან ტრანსპორტირება უფრო იაფად ხდება. ამანაც ასახვა პოვა ჩინეთიდან გადაზიდვების მოცულობაზე. ჩვენც ჩამოგვაქვს ჩინეთიდან ასეთი ტვირთები და დაახლოებით 30%-იანი შემცირებაა. ეს კი პირდაპირ აისახება მთლიან მოცულობაზე.
სეზონურობაც თავის კვალს ტოვებს, იანვარი და თებერვალი არააქტიური პერიოდია. მარტიც იგივე დონეზე იქნება, ხოლო აპრილის მეორე ნახევრიდან და მაისიდან უფრო მეტი აქტივობა დაიწყება“, - განმარტავენ „სქაი ლოჯისთიქსში“.
სსიპ სამოქალაქო ავიაციის სააგენტოდან გამოთხოვილი ინფორმაციის მიხედვით ირკვევა, რომ 2023 წლის იანვარ-თებერვალში საჰაერო გზით გადაზიდული ტვირთების მოცულობამ 2 507,126 ტონა შეადგინა, 2022 წლის ანალოგიურ პერიოდში კი 3 115,126 ტონა. შესაბამისად კლება 19,52%-ია.
2023 წლის იანვარ-თებერვლის განმავლობაში თბილისის საერთაშორისო აეროპორტის მიერ 2019 წლის იანვარ-თებერვალში გატარებულ ტვირთნაკადთან შედარებით კლება 25,19%-ია. 2019 წელს იანვარ-თებერვალში აეროპორტი 3 351,154 ტონა ტვირთს მოემსახურა.
2020 წლის იანვარ-თებერვალში თბილისის საერთაშორისო აეროპორტმა 2 736,265 ტონა ტვირთი გაატარა, რაც იმას ნიშნავს, რომ 2023 წლის იანვარ-თებერვალში 2020 წლის ანალოგიურ პერიოდთან შედარებით ტვირთბრუნვის 8,37%-იანი კლება დაფიქსირდა. რაც შეეხება 2023 იანვრ-თებერვლის მაჩვენებლების შედარებას 2021 წლის ანალოგიური პერიოდის მაჩვენებლებთან კლება 5,57%-ია. 2021 წელს იანვარ-თებერვალში თბილისის საერთაშორისო აეროპორტმა 2 655,011 ტონა ტვირთი გაატარა.
შეგახსენებთ, რომ დღეისათვის საქართველოს აეროპორტებიდან ტვირთებს მხოლოდ თბილისის საერთაშორისო აეროპორტი ემსახურება.