საპენსიო სააგენტომ 3.5 მლნ ლარი „ნიკორას“ ობლიგაციებში ჩადო, რაც პირველი ინვესტიციაა ქართულ კორპორაციულ ობლიგაციებში. საერთო ჯამში „ნიკორამ“ საჯარო ემისიის სახით ბაზარზე 35 მილიონი ლარის, 3-წლიანი ობლიგაციები განათავსა. ობლიგაციები დაილისტება საფონდო ბირჟაზეც.

„ეს არის პირველი გადაწყვეტილება, რომლითაც საქართველოში თანხა დავაბანდეთ კორპორაციულ ობლიგაციებში. ჩვენ საქართველოში ვყიდულობდით სახაზინოებს, საბანკო დეპოზიტებს, მიმდინარე ანგარიშებს, სუვერენულ ობლიგაციებს, ეს იყო პირველი ადგილობრივი კორპორატიული ობლიგაციები, რომლებიც შევიძინეთ. ეს არის კარგი საპენსიო ფონდისთვის, მისი საინვესტიციო დინამიკისთვის, მეორე მხრივ, კარგია ქვეყნისთვის, ეკონომიკისთვის, კაპიტალის ბაზრის განვითარებისთვის, გარკვეული სტიმულია და სიგნალია სხვა პოტენციური ემიტენტებისთვის, რომ უფრო მეტად განიხილონ კაპიტალის ბაზრის ინსტრუმენტები და გამოუშვან,” - განაცხადა საპენსიო სააგენტოს უფროსმა საინვესტიციო ოფიცერმა გოგა მელიქიძემ.

საპენსიო სააგენტოს ყოფილმა ხელმძღვანელმა ფინანსისტმა ლევან სურგულაძემ „კომერსანტთან“ საპენსიო ფონდის მიერ ადგილობრივ ობლიგაციებში დივერსიფიცირებულად განთავსების დაწყებაზე ისაუბრა.

„საპენსიო ფონდის ადგილობრივ ობლიგაციებში დივერსიფიცირებულად განთავსების დაწყება, იქნებოდა მნიშვნელოვანი წინ გადადგმული ნაბიჯი, საპენსიო ფონდის სახსრებით რეალური ეკონომიკის დაფინანსების დაწყების და კაპიტალის ბაზრის განვითარების სტიმულირების თვალსაზრისით. ასეთი პრეცედენტი ნამდვილად წაახალისებს სხვა პოტენციურ ემიტენტებსაც, რომ ბაზარზე მათაც გამოუშვან როგორც საკრედიტო (ობლიგაციები), ისე წილობრივი (აქციები) ფასიანი ქაღალდები. დათქმა, რომელიც საუბრის დასაწყისში გაჟღერდა, მდგომარეობს იმაში, რომ ნებისმიერი საინვესტიციო აქტივობის დაწყებამდე, როგორც უმნიშვნელოვანესი აუცილებელი წინაპირობა, საპენსიო სააგენტოს უნდა გააჩნდეს სრულიად დამოუკიდებელი რისკის კონტროლის სტრუქტურა, შესაბამისი ინფრასტრუქტურით - რისკის კონტროლის პროცესები, პროცედურები, მეთოდოლოგიები, საუკეთესო საერთაშორისო სტანდარტების მიხედვით. სამწუხაროდ, საპენსიო სააგენტოს დღეს ასეთი დამოუკიდებელი რისკის კონტროლის სტრუქტურა და შესაბამისი ინფრასტრუქტურა არ გააჩნია“, -აღნიშნა ლევანს სურგულაძემ.

აღსანიშნავია, რომ 2022 წლის 1 იანვრიდან 30 ივნისის ჩათვლით საპენსიო სააგენტოში 5,289 დამსაქმებელი და 56,357 დასაქმებული გაწევრიანდა. შედეგად, საპენსიო სქემაში ჩართულ დასაქმებულთა რაოდენობამ ჯამში 1,292,246 შეადგინა, ხოლო საინვესტიციო აქტივების წმინდა ღირებულება 2,436,907,086 ლარი იყო, საინვესტიციო საქმიანობის შედეგად მიღებულმა წმინდა ამონაგებმა, კი 335, 679,787 ლარი შეადგინა.