კომპანია „საირმე მინერალ ვოთერსის“ თანამშრომლები 13 თებერვლიდან, კომპანიის შენობასთან, სრულმასშტაბიან გაფიცვას იწყებენ.

ამასთან დაკავშირებით პროფკავშირი „ლაბორი“ განცხადებას ავრცელებს, სადაც ნათქვამია, რომ 13 თებერვალს დილის 9 საათიდან „ლაბორის“ ორგანიზებით კომპანია „საირმე მინერალ ვოთერსში“, საირმეში ქარხნის მიმდებარე ტერიტორიასთან, სრულმასშტაბიანი უვადო გაფიცვა დაიწყება. აქციის მონაწილეები ხელფასების გაზრდას, საპენსიო გადასახადის დამსაქმებლის მიერ დაფარვას, ღირსეულ და უსაფრთხო შრომით პირობებს ითხოვენ. მოთხოვნების ჩამონათვალი 10 პუნქტს მოიცავს.

განცხადებას სრულად გთავაზობთ:

„გაცნობებთ, რომ 2023 წლის 13 თებერვალს დილის 9 საათიდან „ლაბორის“ ორგანიზებით კომპანია „საირმე მინერალ ვოთერსში“, საირმეში ქარხნის მიმდებარე ტერიტორიასთან, დაიწყება სრულმასშტაბიანი უვადო გაფიცვა.

მოგახსენებთ, რომ მედიაციის პროცესმა უშედეგოდ ჩაიარა დასაქმებულები ითხოვენ:

1. ხელფასების 30%-იან ზრდას;

2. საქსტატის მონაცემების შესაბამისად ხელფასების ყოველწლიურ ინდექსაციას;

3. საპენსიო გადასახადის დამსაქმებლის მიერ დაფარვას;

4. ღირსეულ და უსაფრთხო შრომით პირობებს;

5. აპროტესტებენ ქარხანაში არსებულ ანტისანიტარიას და ითხოვენ მის მოწესრიგებას;

6. დამსაქმებლის მხრიდან შანტაჟისა და მუქარის აკრძალვას;

7. კოლექტიურ შეთანხმებას;

8. მენეჯმენტის ბრალეულობის გამო ქარხნის სრულფასოვან ფუნქციონირებას;

9. დამფუძნებლებთან შეხვედრას, რადგან მიაჩნიათ რომ ადგილობრივი მენეჯმენტი განზრახ აზიანებს და აკოტრებს ქარხანას;

10. კომპანია ცდილობს დასაქმებულების ერთმანეთთან დაპირისპირებას, მათ შორის ჩვენს ხელთ არსებული ინფორმაციით უცხო ქვეყნის მოქალაქეებით ჩანაცვლებას.

„ლაბორი“ განვითარებულ მოვლენებზე სრულ პასუხისმგებლობას კომპანიის ამჟამინდელ მენეჯმენტს აკისრებს“, - ნათქვამია განცხადებაში.