მშობიარობის სტატისტიკაში საკეისრო კვეთის წილი 50%-მდეა ასული, რაც დემოგრაფიული პრობლემების შექმნის წინაპირობაა, — ამის შესახებ ჯანდაცვის მინისტრმა ზურაბ აზარაშვილმა პარლამენტის ჯანდაცვის კომიტეტზე განაცხადა.

„კომერსანტი“ დაინტერესდა რით არის გამოწვეული საკეისრო კვეთების ასეთი მაღალი მაჩვენებელი ქვეყანაში. როგორც ექიმი მეან-გინეკოლოგი, „პინეო სამედიცინო ეკოსისტემის“ პერინატალური ცენტრის ხელმძღვანელი ზაზა სინაურიძე მიიჩნევს, საკეისრო კვეთების მაღალი მაჩვენებელი ინფორმაციის ნაკლებობის და სამედიცინო პროვაიდერების მხრიდან ფინანსური დაინტერესების შედეგია.

„საკეისრო კვეთების ასეთ მაღალ მაჩვენებელს ორი მდგენელი აქვს, პირველი არის ის, რომ შესაბამისი ინფორმაცია მშობიარეს არ მიეწოდება იმის შესახებ, რომ ეს ოპერაცია არც თუ ისე კარგია. მეორე არის ის, რომ სახელმწიფო უფრო მეტს იხდის საკეისრო კვეთაში ვიდრე მშობიარობაში და შესაბამისად სამედიცინო პროვაიდერების მხრიდან დაინტერესება უფრო დიდია. ამას უნდა კომპლექსური მიდგომა, განათლება ამაღლება როგორც პაციენტების, ასევე ექიმების მიმართულებით. მარტივ რაღაცას ვიტყვი, „პინეოში“ ჩემთან ძალიან ბევრი უცხოელი პაციენტი მშობიარობს და, მაგალითად, თუ მოდის ქართველი ორსული უმეტესობა მეუბნება, რომ საკეისრო კვეთა უნდათ, თუმცა ყველამ იცის, რომ ჩვენების გარეშე არ ვაკეთებ, უცხოელები კი პირიქით, პირველი იმას მეუბნებიან, რომ ეს არ სურთ. ეს არის განათლების საკითხი.

რაც შეეხება ჩვენებას, ხშირად მიზეზებს იგონებენ ამიტომ, არასწორი საბჭოთა მიდგომაა, რომ ეს სამინისტრომ უნდა გააკონტროლოს. თუმცა, ვერავინ ვერ შეძლებს ამის კონტროლს. ამ ყველაფრისთვის არსებობს ეკონომიკური ბერკეტი და განათლება, რომ ორსულმა და ექიმმა არ გააკეთოს ოპერაცია უმიზეზოდ. რატომ მაქვს მაგალითად მე საკეისრო კვეთის წილი 24% და სხვას 70%? — აქ ყველაფერი ნათელია“, — ამბობს ზაზა სინაურიძე.

მეან-გინეკოლოგმა ის რისკფაქტორებიც დაასახელა, რომლებიც ყველა მშობიარემ უნდა გაითვალისწინოს.

„საკეისრო კვეთა არის ჩარევა, იხსნება მუცლის ღრუ, იხსნება საშვილოსნოს ღრუ. რაც მთავარია, საშვილოსნოზე ჩნდება ის ნაწიბური, რომელიც ძალიან სახიფათოა შემდგომი ორსულობისთვის. თუკი ექიმი კარგად აუხსნის მშობიარეს ფიზიოლოგიური მშობიარობის უპირატესობებს, ქალი აუცილებლად მიიღებს შვილის ბუნებრივი გზით გაჩენის გადაწყვეტილებას“, — განმარტავს ზაზა სინაურიძე.

ჯანდაცვის მსოფლიო ორგანიზაციის მონაცემებით, ქირურგიული მეთოდის გამოყენება მშობიარობათა მხოლოდ 10-15%-შია აუცილებელი – როდესაც ფიზიოლოგიური მშობიარობა ნაყოფის ან დედის ჯანმრთელობას საფრთხეს უქმნის და ქირურგიული ჩარევის აუცილებლობა სამედიცინო ჩვენებით დასტურდება.