საკონდიტრო საწარმო „მადარტი“ ფერმერებისგან კენკროვანი პროდუქციის შეძენას იწყებს. როგორც კომპანიაში განმარტავენ, წლის განმავლობაში 100 000 კგ კენკროვანებს მოიხმარენ და სწორედ ამიტომ, წლის გეგმას, ანუ 100 00 კგ პროდუქციას წინასწარ იყიდიან და შემდგომი გამოყენებისთვის გაყინვის მეთოდით შეინახავენ.
„იმისათვის, რომ ჩვენს წარმოებულ პროდუქციაში მაქსიმალურად გამოვიყენოთ ქართული კენკრა, შევინარჩუნოთ მისი არაჩვეულებრივი გემო და ამასთან ერთად, ხელი შევუწყოთ საქართველოში კენკროვანი კულტურის განვითარებას გადავწყვიტეთ, რომ ჟოლოსა და ალუბლის წლევანდელი მოსავლიდან, შევიძინოთ მაქსიმალური რაოდენობა და თავად შევინახოთ კვებისა და უვნებლობის შესაბამისი სტანდარტების სრული დაცვით“, განმარტავენ საკონდიტრო კომპანიაში.
„მადარტში“ აცხადებენ, რომ გასული წლების ზამთრის სეზონზე მთლიანად იმპორტ დამოკიდებულნი იყვნენ და 2021 წელს სატესტოდ 30 ტონა კენკრა შეინახეს. პროექტმა გაამართლა.
„ქართული კენკრის მარაგების გაკეთების სურვილი ყოველთვის გვქონდა, რადგან ჩვენი, ადგილობრივი ნედლეულის მოხმარება, გაცილებით არომატულს და გემრიელს ხდის ჩვენს წარმოებულ პროდუქციას და მუდმივად ვეძებდით რესურს, რომ იმ ხარისხის კენკრა შეგვეძინა ქართული ბაზრიდან და იმ სტანდარტით შეგვენახა, რა ხარისხისა და სტანდარტების მოლოდინიც „მადარტის“ მომხმარებელს აქვს, ამიტომ გვიხარია, რომ წელს გვეძლევა საშუალება შევინარჩუნოთ ჩვენი პროდუქციის უმაღლესი ხარისხი და ამასთან, ხელი შევუწყოთ კენკროვანი კულტურის განვითარებას საქართველოში“, - განუცხადეს „კომერსანტს“ „მადარტში“.
დღეისათვის „მადარტმა“ ჟოლოსა და ალუბლის შეძენაზე განაცხადა, თუმცა კომპანიამ უკვე მოახერხა მოცვის შეძენა და გაყინვა.
„ახლა ვავსებთ ჟოლოსა და ალუბლის მარაგებს, ეს კენკრის ის სახეობებია, რასაც ჩვენს პროდუქციაში ძირითადად ვიყენებთ, შესაბამისად სხვა ხილზე ჯერ-ჯერობით მოთხოვნა არ გვექნება“, - აცხადებენ კომპანიაში.
„მადარტში“, რომელიც საკონდიტრო პროდუქტების ბაზარზე ერთ-ერთი ცნობილი ბრენდია, აცხადებენ, რომ მზარდი ინფლაციის მიუხედავად მათ პროდუქციაზე მოთხოვნა მზარდია და ფასების მხრივ კომპანია მაინც საერთაშორისო ფასებზეა დამოკიდებული.
„ბოლო ერთი წლის განმავლობაში, ჩვენი მომხმარებლების მხრიდან პროდუქციაზე მოთხოვნა სტაბილურად იზრდება, რაც შეეხება ფასების ზრდას, ისე როგორც ნებისმიერი სხვა ქართული თუ უცხოური კომპანია, ჩვენც დამოკიდებულები ვართ მსოფლიო ბაზრის ცვლილებებზე და იმედია დროულად დარეგულირდება, რომ ჩვენც სტაბილურ ფასად შევძლოთ ნედლეულის შეძენა და წარმოებული პროდუქციის რეალიზაციაც“, აცხადებენ კომპანიაში.
როგორც ცნობილია, „მადარტი“ წარმოება და რეალიზაციის პუნქტები თბილისშია განთავსებული, თუმცა სექტემბრიდან „მადარტი“ გაიხსნება რუსთავშიც.
„სექტემბრიდან გვექნება სიახლე, რუსთავში გაიხსნება ჩვენი პირველი სერვის-ცენტრი, სადაც მომხმარებელს წინასწარ შეეძლება პროდუქციის შეკვეთა და მეორე დღეს გატანა. ვფიქრობთ ეს ახალი, საინტერესო კონცეფციაა ჩვენი კომპანიისთვის და იმედი გვაქვს ქალაქიდან გასვლის პირველი მცდელობა წარმატებით გაგრძელდება“, - აცხადებენ „მადარტში“.
ფერმერებს, ვისაც “მადარტთან“ თანამშრომლობის სურვილი აქვთ, უნდა დაუკავშირდნენ კომპანიას: Purchase@madart.ge